ھندەک سنێلە چووینە رێزێن گروپێن تیرۆرستی
ئه‌ڤرۆ نيوز:
ل سالێن بۆری ل ھەرێما کوردستانێ ھژمارەک زارۆ و سنێلان پەیوەندی ب رێکخراوێن تیرۆرستی کریە و ھندەک ھێزێن ھەرێمێ ژی کەسێن خوار ژیێ قانوونی کرینە چەکدار، پەیڤدارێ دەستەیا گشتیا مافێ مرۆڤی ژی دیار کر کو، پێدڤیە دایک و باب چاڤدێریا زارۆیێن خوە بکەن و نابیت ب حەزا خوە بچنە دناڤا تۆڕێن جڤاکی و مالپەڕێن ئینتەرنێتێ.
محەمەد گومەشینی، پەیڤدارێ دەستەیا سەربخۆیا مافێ مرۆڤی بۆ رۆژناما ئەڤرۆ دیار کر کو ل گورەی جارنامە و رێکەفتنێن جیھانی بکارئینانا زارۆ و سنێلێن خوار ژیێ قانوونی قەدەغەیە بۆ کارێن چەکداری و نابیت ل سەر توندۆتیژیێ بھێنە پەروەردەکرن ھەتا نابیت کار ل گەل زەلامان ژی بکەن و گۆت: دەستەیا مافێ مرۆڤی ل ھەرێما کوردستانێ تەکەست دکەت کو بکارئینانا زارۆیێن خوار ژیێ قانوونی کارێ حزبایەتیێ بکەن و ببنە چەکدار، ھەتا ل رێکەفتنێن جیھانی ھاتیە قەدەغە کرن و چو ھێز و لایەنەکێ سیاسی نابیت کەسێن خوار ژیێ 18 سالیێ بکار بینن و نابیت ل سەر سیاسەتێ پەروەردە بکەن.
گومەیشینی د بەردەوامیا ئاخفتنێن خوە دا گۆت: ھەتا قانوونێ سزا بۆ ئەڤان کەس و لایەنان دیار کریە، چونکی ل سالێن بۆری مە دیت چەندین زارۆ ھاتینە بکارئینان بۆ مەرەمێن جودا، ژ وانا زارۆ ھاتینە چەکدار کرن و بۆ کارێن سیاسی ھاتینە بکارئینان، ھەتا گەھشتیە ئاستەکی ل سەر بنەمایێ توندڕەویێ دھێنە بکارئینان.
محەمەد گومەشینی ئەو چەندە ژی دا زانین کو ل ھەرێما کوردستانێ ھژمارەکا زۆرا خێزانان گازندە و سکالا تۆمار کرینە ل سەر ئەڤان لایەنێن زارۆیێن وان کرینە چەکدار و بۆ کارێن سیاسی دھێنە بکارئینان و گۆت: مخابن ل سالێن بۆری ل ھەرێما کوردستانێ ب رێیا تۆڕێن جڤاکی ھژمارەکا زۆرا زارۆیێن خوار ژیێ قانوونی پەیوەندی ب گروپێن تیرۆرستی کریە، ئەگەرێ سەردا برن و چوونا ئەڤان زارۆیان بۆ ناڤا رێزێن گروپێن توندڕەو تیرۆرستی بۆ ڤێ چەندێ ڤەدگەڕیت ژلایێ کەس و کارێن زارۆیان چاڤدێری ناھێتە کرن، ئەڤرۆ ئەم یێ دبینین ل ھەرێما کوردستانێ ھەموو کەسەک ھەتا زارۆ ژی ب ساناھی دشێن ھەموو تۆڕێن جڤاکی و مالپەڕێن ئینتەرنێتێ ڤەکەن، ئەڤەژی دبیتە ئەگەر کو زارۆ بەر ب توندڕەویێ بھێتە پەروەردە کرن.
