ھونەر بوویە پشکەک ژ ژیانا سارایێ
ئەڤرۆ، عەلی حاجی:
سارا دلشاد قوتابیەکا پەیمانگەھا ھونەرێن جوانە ل باژێرێ ھەولێرێ، د دیدارەکێ دا بۆ رۆژناما ئەڤرۆ دیارکر کو ژیانا وێ بوویە پشکەک ژ ھونەری و ھەستێن خوە ب رێیا ھونەر نیشان ددەت، وێ دڤێت خوە دناڤ گەلەک جۆرێن ھونەری دا ببینیت.
سارایێ گۆت: د ژیەکێ بچووک دا ئەز نێزیکی ھونەری بووم و ب تایبەتی ژی شانۆیێ و پشتی چوویمە پەیمانگەھا ھونەرێن جوان من ل پشکا پەیکەرسازیێ خواندنا خوە بەردەوام کر و تایبەتمەندیا من پەیکەرسازیێ دایە، بەلێ ئەڤە وێ چەندێ ناگەھینیت دێ ژ تایێن دی یێن ھونەری دوور کەڤم، ئەز بەردەوام کارێن دی دکەم وەکو شێوەکاری و مەیک ئاپ و ئەز ھەستێن خوە ب رێیا کارێ خوە دیار دکەم و ب دیتنا من ئەو کێماسیێن د ژیانێ دا ھەنە من ب رێیا خوە بەرچاڤ کرینە و پەیکەرسازی ئێک ژ زەحمەترین و گرنگترین جۆرێ ھونەری یە و ژبەر وێ چەندێ من ئەو پشکە ھەلبژارت.
ل دووماھیێ گۆت: راستە د ڤی سەردەمی دا ئافرەت گەلەک کاران ل دەرڤەی مالێ دکەن، بەلێ ل گەل ھونەری ھەتا نیڤا رێکێ بەردەوام دبن و دووڤدا بۆ ژیانەکا ئاسایی ژیانێ دبەتە سەری یان ژی کارەک دی دکەت و ئەو ئافرەتا ب حەزژێکرن ڤە ئێکەلی ھونەری ببیت گەلەک زەحمەتە بشێت بێ ھونەر بژیت و دایکا من ھەر د ژیەکێ بچووک دا ئەز ئاشنایێ ھونەر کرم و رێیەکا مەزن ل بەر من ڤەکر و مالا من پشتەڤانیەکا باش ل من دکەن.
