ھێمان دێ سترانەکا خوە یا نوو بەلاڤ کەت
ئەڤرۆ، رێوار محەمەد رەشید:
سترانبێژا گەنج ھێمان سەباح د دیدارەکێ دا بۆ بەرپەرێ ھونەری یێ رۆژناما ئەڤرۆ دیار کر کو دەمێ زارۆ حەزا کارێ سترانگۆتنێ ل دەف وێ پەیداببوو و ل سالا بۆری ب گۆتنا سترانا (شەڤا درێژ) ب شێوەیەکێ فەرمی دەست بکارێ سترانگۆتنێ کر و ھەتا نوکە چەندین سترانێن تۆمارکری ھەنە و گۆت: “بەھرا پتریا سترانێن ئەز دبێژم بابەتێن وان ل دۆر دلداریێ نە، بەلێ د بەرنامێ من دایە ل پاشەرۆژێ سترانان ل دۆر ھەموو بابەتان بێژم، چونکو ھونەر ھەموو لایەنێن ژیانێ ب خوە ڤە دگریت”.
ناڤھاتیێ ل دۆر نووترین کارێن خوە یێن ھونەری ئاماژە دا وێ چەندێ کو ل دەمەکێ نێزیک دێ سترانا خوە یا نوو ب ناڤێ (ل تە نابوورم) بەلاڤ کەت کو ئەڤ سترانە ژ پەیڤ و ئاوازێن (دیار قەسیم)ی یە و ل ستودیۆیا (ھەڤال مەجید) ھاتیە تۆمارکرن و مۆزیکژەنێ گەنجێ خودان شیان (ژێگر کزوی) سەرپەرشتیا ڤی کاری کریە و گۆت: “سەرەرایی ئەنجامدانا ڤی کاری نوکە ئەز بەرھەڤیان بۆ تۆمارکرنا دو سترانێن دی ژی دکەم کو ژڤانە د وەرزێ بھارا ئەڤ سالە دا بەلاڤ بن”.
ل دووماھیێ ھێمانێ خویا کر کو نوکە وێ ستایلێ خوە یێ تایبەت بۆ گۆتنا سترانان ھەیە و گۆت: “نوکە من ل بەر نینە چو سترانێن دوقۆلی بێژم”.
