ھەتا 50 سالێن دى کوردستان دێ ژ قەیرانا ئاڤێ رزگار بیت
ئەڤرۆ نیوز، نەوزاد ھلۆری:
وەزیرێ چاندن و ژێدەرێن ئاڤێ دیارکر کو ب مەرەما پێشڤەبرنا کەرتێ چاندن و دابینکرنا ژێرخانا ئاڤێ ل ھەرێما کوردستانێ ئەوان پلان ھەیە کو 16 بەنداڤا درۆست بکەن و ب سەرکەفتنا وان ژی ھەرێم ھەتا 50 سالان دێ ژ قەیرانا ئاڤێ رزگار بیت خوە ئەگەر رووبار ژی بھێنەگرتن.
عەبدولسەلام مەجید وەزیرێ چاندن و ژێدەرێن ئاڤێ یا حکومەتا ھەرێما کوردستانێ ئەڤرۆ د چارچوڤێ ڤیستەڤالا سالانەیا ھناران ل پارێزگەھا ھەلەبچە دیارکر کو ئەوان پلان ھەیە 16 بەنداڤان ل کوردستانێ درۆست بکەن و گۆت: ( ئەگەر ئەڤ پلان سەر بکەڤیت و ئەو بەنداڤ بھێنە درۆستکرن حکومەتا ھەرێما کوردستانێ دێ شیانێن دابینکرنا ئاڤێ ژ بو ڤەخوارن و چاندنێ ھەبیت بو دەما 50 سالان ژی، خوە ئەگەر قەیرانێن ئاڤێ ل کوردستانێ درۆست ببیت و رووبار ژی بھێنە گرتن).
زێدەتر گۆت: (دنھا دا بەرھەمێن ھاڤینێ پێشڤەچوونەکا باش ب خوه ڤە دیتیە، ب تنێ د نھا دا ئاریشە د بەرھەمێن زڤستانێ دا ھەیە، بەلێ ئەگەر بودجە بۆ بھێتە تەرخانکرن مە پلان ھەیە دو سالێن بھێت بەرھەمێن زستانی ژی تێرا ھەرێما کوردستانێ بەرھەم بینین، ژ بەر کو ھەرێما کوردستانێ زەڤیێن باش ھەنە).
