ھەلویستێ ھەرێمێ ل ھەمبەر تیرۆرێ جڤاکێ نیڤدەولی
ھەر سیمایەکی یان سالۆخەکا دژوار بدەینە داعشان ھێشتا ژی یا کێمە ل بەرامبەر وان، چونکو ئەڤ داعشە و تشتێ ئەو بزاڤێ بۆ دکەن ب دەولەتا ئیسلامێ ل عیراق و شامێ نەیا رەوایە، ل سەر ڤێ چەندێ داعش کەسێن تیرۆرستن نە دینەک ھەیە ئەو دوژمنێن مرۆڤاتیێ و ھەمی ئایین و نەتەوە و نەژادانە، چونکو ئەو خەلکەکی ھەر وەکو ژ ئەختەرەکێ دی ھاتینە و دانپێدانێ ب چو ئاینێن ئاسمانی ناکەن یێن ھاتین بۆ خزمەتکرنا مرۆڤاتیێ و خودێ پیرۆزکرین.. ئەڤرۆ ڤان داعشان ئەڤ ئەردێ خودی بۆ مرۆڤی بەخشکری پیسکریە، لێ داعشیان تەروھشک ب ھەڤرا سۆتینە ب کوشتنا مرۆڤان و داگیرکرنا ئەردی و دزینا مال و سامانێ گشتی و تایبەتی و دەستدرێژی ل سەر جھێن پیرۆز یێن ھەمی ئایینان و سەرپێچکرن ل سەر شوونەوار و شارستانیێ و ل ژێر گەلەک زارناڤێن ئیسلامی ب مخابنیڤە، لێ ئیسلاما بێگونەھە ژ وان ھەتا رۆژا قیامەتێ، کەس ئینکار ناکەت کو ھەرێم ھەر ژ سالا ٢٠٠٣ و ھەتا نھا ئالایێ (ئاشتی و براتی و لێکتێگەھشتن و ھەڤنێزیکی بۆ ھەمی پێکھاتێن عیراقا نوو یا ئێکگرتی و ل ژێر پەیرەو و ھزرا عیراقێ بۆ ھەمیان و ئەم ھەمی د ئازادین د ڤێ عیراقا نوو دا) بلندکریە، ھەر ژ رۆخیانێ و ھەتا نھا ھەرێم بوویە ژیوارەک بۆ سەرانسەری دەڤەرێ و جیھانێ ھەمیێ، کو ئەزموونا ھەرێما کوردستانێ بوویە ئەزموونەکا تاکەیی و جۆراتی بۆ سەرانسەری جیھانێ ژ وان دەستکەفتێن ھەرێمێ و سەرکرداتیا وێ بدەستڤە ئیناین بۆ ھەر کەسێ حەز ژ لێتیکەھشتنێ و ئاشتیێ بکەت ل گەل تەڤ لایەنان ئەڤ چەندە ژی دوژمن بەری دوستان دانپێدانێ پێ دکەت، ھەر ژ ئاڤاکرنا عیراقا نوو و ھەتا نھا باژێرێن ھەرێمێ بوونە پەناگەە و خیڤەتەکا ئارام بۆ ھەمی پێکھاتێن وێ، چونکو ھەرێم بوویە مێرگەکا کەسک بۆ ھەمی مۆزائیکا عیراقێ ل ژێر سایا زەلامێن ئاشتیێ و ئەندازیارێن ئاڤەدانیێ سەرکردێن مە، چونکو سیاسەتا ھەرێمێ سیاسەتەکە دھێتە جوداکرن ب بەلانسکرنێ و براگماتیێ ب رێیا باوەریبوونێ ب مافێن ھەمیان و مافێن مرۆڤی یێن رەوا و تایبەت خێزانێن کۆچبەر ژ ھەمی باژێر و باژێرکێن عیراقێ یێن قەستا باژێرێن ھەرێمێ دکەن، لەورا ب دروستی ھەرێم ئەڤرۆ بوویە خیڤەتەکا مەزن بۆ ھەمی رەنگێن عیراقێ .. ل ڤێ دووماھیێ ژ وان روودانێن داعشێ یێن د ناڤەندێن جیھانی و نێڤدەولی و میدیایی دا چەندین ھەوێن تاگیر ھاتنە کرن بۆ گەلێ ھەرێمێ و ھێزێن پێشمەرگەی ب رەنگەکێ تایبەت کو ھێزێن پێشمەرگەی پرچەک بکەن ژ وان دەولەتێن دوست یێن رۆژ بۆ رۆژ بەر زێدەبوونێ ڤە دچن، چونکو تیرۆرا داعشێ (ڤایرۆسەکە) دێ ھێتە ڤەگوھاستن و گەھیتە ھەمی وەلاتێن جیھانێ، ھەکە نەھێنە بنبرکرن ل سەر ئەردێ کوردستانێ سەرەرای پێشکێشکرنا شەھیدان و چەندین بھایێن گران و تێکۆشینان ژ پێخەمەت نەھێَلانا ڤان دەواعشان ب ھاریکاریا وان وەلاتان ب لێدانا ھێلێنێن خرابیێ، ئەڤرۆ پێشمەرگە شەرێ ڤان داعشان دکەن ب ناڤێ ھەمی جیھانێ ب پرەنسیپێ باوەریێ و ئیرادەتێ دا کو ئاشتیێ و ئازادیێ د رووبەرێن دەڤەرێ دا بەرقەرابکەن و جیھانێ ب گشتی، مەرەم ژ ڤێ چەندێ ژی ئەوە کو ھندەک پەیامێن گرنگ دھنێرین دەبارەی وێ دۆزا ئەم شەری بۆ دکەین ل دژی داعشێ، لەورا دبێژم پرچەککرنا پێَشمەرگەی ئەڤرۆ بوویە ئەرکەکێ ئەخلاقی و مرۆڤاتی ژ وان وەلاتان یێن شیان ھەین، نەخاسمە ئەزموونا ھەرێمێ و سیاسەتا بوویە جھێَ شانازیا ھەمی جیھانێ و باشترین میناک بۆ ھەرکەسێ باوەری ب ئاشتیێ ھەیی و بۆ دخەبتیت، ئەڤرۆ حوکمەت و گەلێ ھەرێمێ سوپاسدارێ ھەمی وان دەولەتێن ھەڤدوستە بۆ وێ پشتەڤانیا وان کری و ھاری پێشمەرگەی کرین، ل رۆژێن داھاتی ژی دێ ئەو ھەمی سوپاسیا ھەرێمێ و گەلێ وێ کەن و ب تایبەت ھێزێن پێشمەرگەی بۆ بەرسنگگرتنا ھیزا ڤی ڤایرۆسێ کوژەک ب لێدانا دربێن باوەریێ ژ لایێ پێشمەرگەی ڤە، چونکو چارەسەرکرنا وان ب تنێ ب بنبرکرنا رەھو رووشالێن وێ یە ژڤی ئەردێ پیرۆز کو ھەمی گەلێن جیھانێ بژین ب ئێمناھی و ئارامی.
و: ئەڤرۆ
