ھەڤژینی نە تێرکرنا حەزایە بەلکو گرنگیدان ب ھەستایە
ئه‌ڤرۆ نيوز:
ئەو ھەڤژینێن ھەستێن ئێکدو دشێکنن چ چەقێن شاش ژێ نابەن، بەلێ دەمێ دبیتە ئاریشە ژنوو ھەڤژین ئەوی دەردی دبێژن کا چەند بوویە ئەگەرێ پاشڤەبرنێ، ژبەرکو ھەست ل دەف ھەڤژینا ب گرنگترین خال دھێتە دیتن ژبەرکو ھەڤژین کەسانێن ئێکێ نە ل گەل ھەستێن ئێکدو دژین، شارەزایێن جڤاکی ژی دبێژن: ھەستکرن ب ئێک ژیانا ھەڤژینان یا رۆحی موکمتر لێ دکەت.
ژیان فەیسەل ئێک ژ وان ژنانە یێن ئاریشێن وێ یێن خێزانی رۆژ بو رۆژێ بەرفرەە دبن و گۆت: (ئەگەرێ ڤێ چەندێ نە پارە و مالێ دونیایێ یە، بەلکو ھەستکرنا ھەڤژینێ منە ل ھەمبەر ھەموو لڤینێن ژیانا من، چونکی جاران دەمێ من دڤێت ھەستێن خوە بو بێژم ئەو چ گرنگیێ پێ نادەت و دکەتە ترانە و من پاشڤە دبەت، ھەتا جاران ئەز ب تێلفونێ ل گەل دئاخڤم ئەو سفکاتیێ ب من دکەت).
کاروژ، ن/ خۆدان ھەڤژینە و بەحسێ ھەڤژینا خوە کر و گۆت : (دەمێ ل گەل ھەڤژینا خوە دئاخڤم و ھەستێ خوە یێ رومانسی بو دەردبرم، ئەو من پاشڤە دبەت و دبێژیت ما شولا مە ئەوە ئەم ژ وان قوناغا یێن دەرباز بووین و دڤێت ئەم وان رەفتارا نەکەین، ئەڤە 10 سالە مە ھەڤژینی پێک ئینای و ل گەل ھندێ ژی مە بتنێ دو زارو یێن ھەین و ئەو ھەست ب ڤیان و عەشقێ ناکەت و ئەز ژی تووشی شکەستنێ دبم و ھەست ڤالاتیا ھەستا دکەم ل گەل ھەڤژینا خوە، دلێ من ل گەل وێ یێ شکەستی و جاران ژی ھزر دکەم کو ھەڤژینی نە ب سێکس و نڤینا ھەڤژینایە بەلکو ب ھەستایە).
گەلاڤێژ ھەمزی گۆلی، چالاکڤان د بیاڤێ جڤاکی دا دیار کر کو ھەڤژینی پیروزترین پەیوەندیا ھەڤالینیە دەمێ ھەڤژین ل ئێکدو دگەھن نەخاسمە ھەکە د ھەستێن ئێک بگەھن و ڤیان و حەز ژێ کرن بو ئێکدو ھەبیت نەک ئێکدو پاشڤە ببەن و گۆت: (لێ ھەکە ھەڤژین ژلایێ ھەستانڤە ئێکدو بریندار بکەن دێ تووشی دەردێن مەزن یێن گێولی بن ل گەل ئێکدو دێ تووشی ئالوزیێن دەروونی بن، چونکی دەمێ مال یا ئارام بیت خێزان ب گشتی دبیتە میرگا ھەست و ڤیانا، بەلێ بەرۆڤاژی دەمێ ھەڤژین ل گەل ھەستێن ئێک نەگۆنجن و ڤیان بو ئێکدو نەبیت ئەو تووشی ئاریشێن مەزن دبن، چونکی د ئێکدو ناگەھن و ئاگەە ژ نەخوشی و گیان و ھەستێ ئێکدو نینە).
گەلاڤێژێ گۆتژی: (تشتێ سەیر ئەوە دەمێ ھەڤژین تشتەکی ژ ئێکدو دخازن بۆ نمونە ھەمبێزکرنا ئێکدو یان دەست گرتن و ئاخفتنێن رۆمانسی و ئێک ژ وان بابەتی بگریت پاشڤە ببەت ئەو ھەڤژینە گەلەک بێزار دبیت و تووشی نەخوشیێن مەزن دبیت ل گەل کەسایەتیا خوە).
ژ لایەکێ دیڤە ئێحسان دێرکی شارەزا د بیاڤێ جڤاکی دا دیار کر کو رامان ژ ھەڤژینیێ ئەوە ئانکو دو ھەستێن گەلەک نێزیکی ئێک و پێکڤە و خوە گوری کرن و پێکڤە ژیان و پێکڤە قوربانی دان و گۆت: (ژبەرھندێ جاران ھەڤژین ھندەک رەفتارا دکەن بێ کو ھەست پێ بکەن ئەڤان کریارا چ رامان ژێ دچیت و چ ئاریشە ژێ پەیدا دبن).
دێرکی نمونەک ژی ئینا و گۆت: (دەمێ ھەڤژینەک ل گۆپیتکا ھەستێن گەرم و خوش دا بیت و گێولێ وی ل رەفتارەکا ڤیانێ بدەت و لایەک ڤەبریت و رێیێ نەدەتێ ئەو ھەڤژینە ھەردوو تووشی گریێن دەروونی دبن و دبیت ئەو ب رۆژان نەکەڤیتە ل سەر کەسایەتیا خوە یا سرۆشتی، چونکی ھەست ھێزێ ددەنە ھەموو گیانی و لەشێ ھەر تاکەکی بەرھەڤ دکەت بو ژیانەکا ئارام و بەختەوەر).
