یاریزانهك و راهێنهرهكێ دهۆكێ دێ پشكداری قارهمانیا رۆژئاڤا ئاسیا بن
ئهڤرۆ،
بڕیاره ل حهفتیا بهێت راهێنهرهك و یاریزانهكێ پارێزگهها دهۆكێ ل گهل ههلبژارتیێ ئیراقێ پشكداریێ د قارهمانیا رۆژئاڤا ئاسیا یا تهپا مێزێ دا بكهن، ئهوا دێ ههڤڕكیێن وان ل وهلاتێ ئۆردن ب پشكداریا زێدهتری ههشت وهلاتان هێته كرن.
پیرس عهلی یاریزانێ ئێكانه یێ پارێزگههێ دناڤ پێكهاتیێ ئیراقێ دا بۆ رۆژناما ئهڤرۆ گۆت: ههر ئێك ژ بشار رهمهزان وهكو راهێنهر بۆ ئاستێ ژیێن پشكۆژان و ئهز بۆ ئاستێ پێشكهفتیان ل گهل ههلبژارتیێ ئیراقێ دێ پشكداریێ د قارهمانیا رۆژئاڤا ئاسیا دا كهین ئهوا دێ پایتهختێ ئۆردن عهمان ژ 25 ڤێ ههیڤێ ههتا شهشێ تهباخا بهێت مێڤانداریا وێ كهت كو ئهڤ قارهمانیه دهێته هژمارتن ئێك ژ ب هێزترین قارهمانیێن دهڤهرێ ژبهر پشكداریا چهند ههلبژارتیێن خودان شیان و یاریزانێن ههڤڕك ل سهر ئاستێ ئاسیا و عهرهبی دا ههین لهورا پشكداریا مه دێ بهێزترین تاقیكرن بیت كو ب هیڤییا وێ یهكێ ب ئهنجام و مفایهكێ مهزن ژێ وهربگرین.
ههروهسا ناڤهاتی گۆت: بۆ ماوهكێ درێژه ئهز راهێنانێن خوه ب شێوهكێ رێكخستی و ل سهر دهستێ راهێنهرێن شارهزا و پیشهكار ئهنجامدهم پێخهمهت باشترین بهرههڤی و ب ئارمانجا ههڤڕكیێ ل سهر رێزێن پێشیێ سهرباری ئهركێ مه ب سانههی نابیت ژبهركو یاریزانێن شارهزا ههنه و خودان سهربۆر، لێ یا د شیان دا بیت دێ باشترین شێوه یاریا خوه ئهنجامدهم وهكو ئێكانه یاریزانێ پارێزگههێ باشترین پشكداری بیت.
