یاریزانەكێ زاخۆ سەرنجا یانەیێن عەرەبی راكێشایە
قەیس وەیس:
مراد عەلی ستێرێ باسكێت بۆلا یانەیا زاخۆ و هەلبژارتیێ ئیراقێ ئەوێ نوكە ب شێوەیی خواستن یاریێ بۆ یانەیا دیجلە ئەلجامعە یا بەغدایی د قارەمانییا عەرەبی دا دكەت، بوویە جهێ سەرنجراكێشا چەند یانەیێن عەرەبی ژبەر ئەوی ئاستێ وی یێ بلند و شیایی ببیتە ئێك ژ باشترین یاریزانێن تیما ئیراقی د قارەمانیێ دا ئەوا نوكە هەڤڕكیێن وێ ب پشكدارییا 18 یانەیان ل دوحە پایتەختێ قەتەر مێڤاندارییا وێ دكەت.
ل دووڤ دەنگۆباسێن د ناڤ قارەمانیێ دا هاتینە بەلاڤكرن سێ یانەیێن عەرەبی ئەو ژی ئەهلی و قەتەر یێن قەتەری و قادسیە یا كۆێتی گرنگی ب یاریزانێ زاخۆ داینە، دەزگەهێن راگەهاندنێ ل وەلاتێ قەتەر ئەوێن دناڤ هەڤڕكییان دا ئاماژە بۆ وێ چەندێ كرینە هەرسێ یانەیان دێ پشتی قارەمانیێ بزاڤێ كەن پەیوەندیێ ب یاریزانێ زاخۆ كەن پێخەمەت رازیبوون ل سەر گرێبەستا ئێك ژ یانەیێن ناڤهاتی.
بۆ زانین تیما دیجلە پلێتا دەربازبوونێ بۆ قۆناغا پێش دووماهییا عەرەبی ژ دەست دا ا پشتی دوهی ب تووشی خوسارەتیێ بوو بەرانبەر یانەیا كوێت یا كۆێتی ب 96- 74 خالان، دڤێ یاریێ ژی دا مراد عەلی شیابوو ئاستەكێ نایاب پێشكێش بكەت.
