یاریزانەكێ پارێزگەهێ ل كازاخستانێ دێ هەڤڕكییا ناسناڤێ ئاسیا كەت
دهێتە چاڤەڕێ كرن دووماهییا ڤێ حەفتیێ كوڕێ پارێزگەهێ و یاریزانێ هەلبژارتیێ ئیراقێ وەهبی سلێمان پشكداریێ د قارەمانیا كۆپا ئاسیا یا یارییا پایسكلان دا بكەت ئەوا دێ وەلاتێ كازاخستان بۆ چار ئاستێن جودا مێڤاندارییا وێ كەت.
هشیار فەریق ئەندامێ كارگێریا یانەیا دهۆك و سەرپەرشتێ یارییا پایسكلان بۆ رۆژنامەیا ئەڤرۆ گۆت: یاریزانێ پارێزگەهێ وەهبی سلێمان بۆ هەلبژارتیێ ئۆلمپیێ ئیراقێ دێ پشكداریێ د قارەمانییا كۆپا ئاسیا دا كەت ئەوا بڕیارە ل شەشی خزیرانێ كو دبیتە سوبەهی پێنج شەمبی وەلاتێ كازاخستان مێڤاندارییا وێ بكەت، ژێگرتنا وەهبی هات پشتی شیایی د هەردو قۆناغێن بۆری یێن قارەمانییا ئیراقێ رێزێن پێشیێ بۆ یانەیا خوە سیناعە ب دەستڤە ئینایی و مانا خوە دگەل هەلبژارتیێ ئیراقێ مسۆگەر بكەت، ئەڤچەندە ژی بۆ راهێنەرێ وی یێ یانەیا دهۆكێ تارق سەعید ڤەدگەڕیت ئەوێ بەردەوام راهێنانان پێدكەت و ئاستێ وان بلندكرییە.
ژلایێ خوەڤە وەهبی سلێمان گەشبینییا خوە دیار كر ب دەستڤە ئینانا ئەنجامەكێ باش و گۆت: هەر زوو مە دەست هاڤێژتیە راهێنانان و بەرهەڤییا بۆ قارەمانیێ دكەین سەرباری هەیڤەك یا مایی لێ پشتی قۆناغا دویێ یا قارەمانییا ئیراقێ ب دووماهی هاتی مە بهێنڤەدان نە دانا بەلكو بەردەوام راهێنانان دكەین، ژبەركو قارەمانیەكا بهێزە و باشترین یاریزانێن ئاسیا پشكدارن و بیتە مەزنترین هەڤڕكی ل سەر ئاستێ كێشوەری، گەشبینم هەڤڕكیێ بكەم هەتا دووماهی چڕكە و ب گەهمە ئارمانجا خوە ئەوژی رێزێن ئێكێ هەتا سێیێ بینن سەرباری ئەركێ من ب سانەهی نابیت لێ رژدین بۆ ئەڤێ ئارمانجێ.
