یاریزانەكێ پیشەكار یانەیا سێمێلێ خاپاند
د داخویانیەكێ دا جێگرێ سەرۆكێ یانەیا سێمێل یا وەرزشی بۆ رۆژنامەیا ئەڤرۆ دیار كر ئەو ژلایێ یاریزانەكێ پیشەكار هاتینە خاپاندن پشتی ئاستێ وی دگەل تیما وان یا تەپا پێی د خولا پلا ئێكا كوردستانێ دا بەرۆڤاژی سیڤی و گۆتنێن وی بوویە و نەچاربووینە دەستان ژێ بەردەن.
زێدەتر پەروەر حسێن گۆت: ب فەرمی مە دەست ژ یاریزان عەلی قاسم بەردا ئەوێ ل سەر تیمێ هاتیە هژمارتن یاریزانێ پیشەكار و هێرشبەرێ تیمێ، پشتی دیاربوویی شیانێن جەستەیی و هونەری د كێمن بەرۆڤاژی ئەوا هاتییە گۆتن و ئەڤچەندە كارتیكرن ل سەر ئاستێ تیما مە كربوو كو ددەمەكی دا مە پشتبەستن ل سەر وی دكر ژبۆ تۆماركرنا گۆلان، لێ پشتی دیاربوویی چو مفایی ناگەهینتە مە ئەم نەچاربووین دەستان ژێ بەردەین، دیسان مە دووڤچوونا ئاستێ وی هاتیە كرن كو زێدەتری شەش مەهـ بوو راهێنان نەكربوو نەك وەكو ئەوی گۆتی بتنێ دو حەفتییە نە كری، سەرباری د سیڤیێ وی دا هاتبوو دیاركرن هێرشبەرێ یانەیێن كەرخ و سیناعە و د خولا تایلەندێ ژی دا یاری كربوو و گۆلكەرێ خولا پلا ئێكا ئیراقێ دگەل یانەیا سیناعە بوو.
هەروەسان ناڤهاتی گۆت: ئەڤا هاتییە كرن خاپاندن بوو وجهێ سەرمزاریێ یە و مە دەست ژێ بەردا، بۆ یاریێن بهێت سەرباری ئاریشەیا مە یا هێرشبەریێ ئەم پشتگەرمیێن یاریزانێن خوەینە و گەشبینم د یاریێن بهێت دا بەردەوامیێ بدەینە ئارمانجا خوە ئەوژی دەستڤە ئینانا پلێتەكا دەربازبوونێ بۆ پلا نایابا كوردستانێ، هەرچەندە ئەركێ مە ژی ب سانەهی نابیت لێ رژدین و پشتەڤانییا جەماوەرێ خوە، رێزبەندیا نوكە ئەم تێدا هاریكارە كو شەڕی بۆ ئارمانجا خوە بكەین.
بۆ زانین تیما فوتبۆلا یانەیا سێمێلێ ب19 خالان رێزا چوارێ د رێزبەندییا خولا پلا ئێكا كوردستانێ دهێت ئەوا تیما رزگاری و كۆیە ب هەڤپشكی ب25 خالان رێزێن ئێكێ و دویێ دهێن و پیشەسازی ب24 خالان رێزا سێیێ دهێت، ژ پێنج یاریێن مایی تیما سێمێل پێدڤی ب چار سەركەفتنان هەیە هەتا دەربازبوونا خوە مسۆگەر بكەت.
