یاریكرن ب هەڤكێشەیێن سیاسی د پاشەڕۆژێ دا دێ ب زیانا شیعەیان ب دووماهی هێت
سیاسەتمەدارەكێ دیارێ شیعە، رەخنێ ل شێوازێ دەنگدانا پەرلەمانتاران دگریت بۆ پۆستێ سەرۆككۆماری و ب دیتنا وی شیعە د ڤێ هەڤكێشەیا نوودا دێ ئالیێ شكەستی بن، چونكی دەنگدان ل سەر بنەمایێ شارەزایی و ژێهاتنا بەربژاران نەبوویە.
عزەت شابەندەر، سیاسەتمەدارێ دیارێ شیعە، شرۆڤەیەكا جودا بۆ كۆمبوونا رۆژا شەمبیێ 11/4/2026 یا جڤاتا نوونەرێن ئیراقێ كر كو یا تایبەت بوو ب هەلبژارتنا سەرۆككۆماری.
شابەندەری ل سەر هەژمارا خۆ یا تۆڕا جڤاكییا «ئێكس» نڤیسییە: كو پەرلەمانتاران ل وەختێ دەنگدانێ نە سەحكرە شیانێن كەسی یێن بەربژاران دا كو هەڤبەركرنێ د ناڤبەرا وان دا بكەن، چونكی ب گۆتنا وی «هەڤبەركرن د وێ ناڤبەینێ دا ب زەحمەت بوو»، بەلكو هەڤڕكیێ رەهەندەكێ دەڤەری و سیاسی وەرگرت.
ئەڤ سیاسەتمەدارێ شیعە هوشدارییەكا توند ژی د دەتە هێزێن دەسهەلاتدارێن شیعە و رادگەهینیت، كو ئەڤ جۆرە یاریكرن ب هەڤكێشەیێن سیاسی د پاشەرۆژێ دا دێ ل سەر زیانا وان ب دووماهی هێت.
شابەندەری دووپات كر كو «شیعەیێن دەسهەلاتێ» د پاشەڕۆژا ڤێ هەڤكێشەیا سیاسی یا نوودا، دێ ئالیێ شكەستی بن.
