یاریگەها زاخۆ دێ سۆپرایزەكێ پێشكێشی جەماوەرێ خوە كەت
د داخویانیەكێ دا سەرۆكێ دەستەكا پشتەڤانێن یانەیا زاخۆ بۆ رۆژنامەیا ئەڤرۆ دیار كر بۆ یارییا ئەڤرۆ دگەل یانەیا نەجەف ژ گەڕا دویێ یا خولا ئیراقێ یا تەپا پێی ئەوان بەرهەڤیێن جێواز و سۆپرایز بۆ جەماوەری و پشتەڤانێن یانەیێ دناڤ یاریگەهێ دا بەرهەڤكرینە و دێ ب شێوەیێ شارستانی و سەردەمانە پشتەڤانییا یانەیا خوە كەن.
زێدەتر وەلات سندی گۆت: ژبۆ یارییا ئەڤرۆ دێ بیتە یا ئێكێ ژ وەرزێ نوو یێ خولا ستێرێن ئیراقێ د ناڤ ئەرد و جەماوەرێ مە دا، لەوما ژی وەكو دەستەكا پشتەڤانێن یانەیا زاخۆ ئەڤە بۆ ماوەیێ 15 رۆژن ل دووڤ بەرنامەكێ تایبەت پلان بۆ باشترین بەرهەڤیێن جەماوەری بۆ یارییا ئەڤرۆ دگەل نەجەف كو جودا بن ژ وەرزێن بۆری و ببیتە سۆپرایز ژی بۆ هەمی یانەیێن پشكدار و جەماوەرێ وەرزشی و فیدراسیۆنا تەپا پێی یا ئیراقێ و دەرڤە و دێ بۆ هەمییان دیاركەین ئەو حەز و ڤیانا دلسۆزێن یانەیێ بۆ تیما زاخۆ.
هەروەسان ناڤهاتی گۆت: ژ بەرهەڤیێن هاتینە كرن زێدەتر 1200 ئامیرێن هەلكرنا دیكێلێ و سمۆك و یاریێن ئاگرین یێن نە قەدەغەكری هاتینە بەر دەستكرن، هەروەسان هزار فایلێن كارتۆنی كو ب ڕەنگێن سۆر و سپی هێمایێ یانەیا زاخۆ نە هاتینە بەرهەڤكرن، دگەل دا تیفویەكێ مەزن نێزیكی 30م و چێكرنا لۆگۆیێ یانەیێ و ئالایی بۆ ناڤ یاریگەهێ دا ئەڤە هەمی ژی بۆ وێ چەندێ یە پشتەڤانێن یانەیا زاخۆ ب شێوەكێ جێواز و جوان پشتەڤانییا خوە دیاربكەن، لەوما ب هیڤی نە جەماوەرێ یانەیێ ژی دگەل مە هاریكاربن و نەهێلن چو كەس سەرپێچییا یاسایا یاریگەهێ بكەت ب هاڤێـنا هەرتشتەكێ بۆ ناڤ یاریگەهێ، بلا یارییا ئەڤرۆ یا كەیفخوەشیێ بیت و هەمی جیهان پەسنا وێ بكەن و ب ئۆمێدین دێ سەركەفتنێ ژی تۆماركەین.
