یارییا ژیانێ
فەهیما ئیبراهیم
زڤڕی د ژۆرا خوە یا بچویک دا، دگەل پرتووکێن خوە و سۆپا داران شەڤبێریێن درێژ دبۆراندن، ئەڤ ژۆرە ل سەر گەلەک چەنگێن مەزنە یێن دناخێ وی دا هاتینە کرن شاهدە و دیدەڤانە، ئاگەهـ ژ هەر هوورهوورکەکێ دناخا وی دا هەیە.
هەموو رۆناهییا دڤەمرینت، بتنێ دگەل چریسکێن ڤی ئاگرێ هەل دمینت. هەموو دەستکەفت و ژ دەستدانێن وی د چریسکێن گەشێن ڤی ئاگری دا دسۆژن. دویکێلا ڤی ئاگری هاریکارییا باراندنا رۆندکێن پەشێمانییا وی دکر؛ ب ساناهیتر دبارین. شەڤێن درێژ دیدەڤانن کا چەند ڕۆندکان دبارینت. بەرێ خوە دا سەمتا دەرکەفتنا دویکێلێ و دگەل خوە گۆت: دەمێ هێشتا زاڕۆ، من چ جاران حەز ژ یارییا خوەڤەشارتنێ نەدکر، من چ جاران ئەو حەزکرن نەبوو ل چ کەسان ب گەڕم، من حەزەک هەبوو هەردەم خوەشتڤیێن من ل بەر چاڤێن من بن.
فڕەک ل وێ قەهوەیا ل بەر سینگێ خوە دا، ژ تەحلاتییێ و ساربوونا وێ ئەنییا وی بوو گرێ.
دیسان دگەل خوە کەتە د گەنگەشەیەکا دژوار دا و گۆت: چ جاران من شارەزاهی د خوەڤەشارتنێ دا نەبوو، هەردەم یێن دی ب ساناهی جهێ من ئاشکرا دکرن، لێ بۆ من گەلەک یا ب زەحمەت بوو ل کەسەکی بگەڕم.
فنجانا قەهوێ دا سەر دەڤێ خوە تا خالی بووی، دانا سەر مێزێ و پشتا خوە دایێ، بەرێ خوە دا پەنجەرەیا نیڤ ڤەکری ل بەرێ بلنداهیێن چیای و ل بەفرا ڕا سپی دنێڕی، ئاخینکەکا کوور راهێلا و دیسان ڤەگەڕیا هزوبیران، دهاتە بیرا وی دەمێ هەر تشت ل دۆر وی تژی ژیان و تژی خۆشی، خیزانەک ل دۆر وی کۆم دبوو. ئەڤڕۆ یێ بتنێ یە، هەر تشت یێ ل دۆر خوە هێلای و قەستا خوەزاییێ کری. خەمێن خوە بۆ داروبەران دبێژت.
دیسان دگەل خوە دئاخڤت، ژ بلی خوە کەس نینە چ تشتان بۆ بێژت: د ڤێ ژۆرا بچویک دا، کەس من تێدا نابینت، دل یێ مری، کەنی و گڕنژین بوونە بیرەوەری، هەر تشت ل دۆر من بوو کابووسەک و ل تارییا شەڤێ حەفکا من دگرت. دزانم هێدی هێدی یێ خوە ژدەست ددەم، پشتی وێ خیانەت ل من کری و من هەموو تشت ژ دەستدای، من زانی من د یارییا ژیانێ ژی دا شکەستن ئینا، دەمێ من شەرتانێ کری من زانی دێ خوسارەت بم.
جهێ یارییێ هاتە گوهۆڕین، گیانێن ل دۆر من هاتنە گوهۆڕین، هەمی تشت هاتنە گوهۆڕین، لێ تشتێ من ئازارددەت هەمی تشت بێ خاترخواستن هاتنە گوهۆڕین، بێ دەلیڤەک بۆ زڤڕینێ هەبن بەرەڤ ڕێیەکا دی ڤە چوون.
نهۆ، مەزن بووم، یاری ژی هاتە گوهۆڕین، ئەڤە دەمەکی درێژە من خوە ل ڤێ ڤەدەرییێ ڤەشارتی، لێ کەس ب جهێ من نەکەتییە، دزانم ئەڤ ڤەشارتنە ژ یێن بەرێ جوداترە، نهۆ، هەر تشت بوو خەریبی، نزانم ڤێ جارێ من خوە باش ڤەشارتییە یان ژی کەسێ نەڤێت ل من بگەڕت؟!