یاریێن دهۆك، شورتە و جەوییە هاتنە پاشئێخستن
لژنەیا بەریكانەیان ل فدراسیۆنا فوتبۆلا ئیراقێ ب فەرمی ڕاگەهاندن سێ یاری ژ هەڤڕكیێن گەڕا هەشتێ یا خولا ستێرێن ئیراقێ دێ هێنە پاشئێخستن ئەوا بڕیارە ئەڤ گەڕا سوبەهی دەستپێبكەن.
لدۆر ڤێ یەكێ ئەحمەد عودە ئەلموسەوی پەیڤدارێ فدراسیۆنا ناڤهاتی دیار كر ب شێوەكێ فەرمی یاریێن هەرسێ یانەیێن دهۆك، شورتە و جەوییە د چارچووڤەیێ گەڕا هەشتێ دا بۆ دەمەكێ نە دیار هاتە پاشئێخستن ژبەر پشكدارییا ئەڤان یانەیان بۆ قارەمانیێن ئاسیایی و كەنداڤی ئەوا بڕیارە یاریێن خوە ل ڤێ حەفتیێ بكەن، ئەڤچەندە ژی وەكو دەلیڤە بۆ ئەڤان یانەیان باشتر بۆ یاریێن خوە بەرهەڤییان بكەن.
دهۆك دێ نەسر مێڤان كەت
هەروەسان ناڤهاتی گۆت: ل دووڤ خشتەیێ یاریێن دەرڤە بۆ هەرسێ یانەیان، ل سێ شەمبییا بهێت یانەیا شورتە دێ مێڤاندارییا یانەیا وەسل یا ئیماراتی كەت ژ چارچووڤەیێ كۆپا ئاسیا بۆ یانەیێن نوخبە، ل رۆژا چارشەمبی د هەمان قارەمانی دا یانەیا جەوییە دێ بیتە مێڤانا یانەیا ئالتین ئاسیر یا توركمانستانی، د هەمان رۆژ دا یانەیا دهۆك ل یاریگەها خوە مێڤاندارییا یانەیا نەسر یا ئیماراتی كەت.
بەرهەڤی بۆ كەنداڤی دهێنە كرن
ژلایەكێ دووڤە ناڤهاتی دیار كردوبارە دێ هەڤڕكیێن خولێ ل سەر ئاستێ گشت یانەیان هێتە ڕاوەستاندن كو بڕیارە ل 11ێ مەها بهێت ژڤانێ پاشئێخستنێ بیت ئەو ژی وەكو دەلیڤە بۆ یاریزانێن یانەیان پشكداریێ دگەل هەلبژارتیێ ئیراقێ بكەن خوە بەرهەڤكرن بۆ كۆپا كەنداڤی یا 26ێ و دێ كەڤنە ل بن كەمپەكێ ڕاهێنانێ دا بەری پشكداریێ د كۆپایێ دا بكەن ئەوا بڕیارە ل 12ێ كانوونا دویێ یا بهێت وەلاتێ كوێت مێڤاندارییا وێ بكەت.
رێزبەندیا یانەیێن كوردستانی د خولێ دا
بڕیار بوو ل سێ شەمبییا بهێت یانەیا دهۆك مێڤاندارییا یانەیا ئەلقاسم بكەت، شورتە مێڤانا كارەبا و جەوییە مێڤاندارییا نەورۆز كربا، پشتی بورینا حەفت گەڕا یانەیا شورتە ب 14 خالان ژ شەش یارییان سەرێ لیستێ دهێت، ئەلكەرمە ب13 خالان رێزا دویێ، زەورا ب هەمان خال رێزا سێیێ، زاخۆ ب12 خالان رێزا چارێ دهێت، جەوییە ب هەمان خال و كێمترییا یارییەكێ ل رێزا پێنجێ دهێت، ژلایەكێ دووڤە رێزبەندییا یانەیێن دی یێن كوردستانی بڤی رەنگی نە، هەولێر ب11 خالان رێزا نەهێ دهێت، نەورۆز ب هەشت خالان رێزا 15ێ دهێت و د هۆك ب پێنج خالان رێزا 18ێ دهێت.
ئەمجەد عتوان سەرێ لیستا گۆلكەران دهێت
ستێرێ یانەیا زاخۆ و هەلبژارتیێ ئیراقێ ئەمجەد عتوان سەرێ لیستا گۆلكەرێ خولێ دهێت پشتی بورینا حەفت گەڕان ب تۆماركرنا شەش گۆلان، لێ هەر ئێك ژ یاریزانان موهەنەد عەلی ژ یانەیا شورتە خودانێ پێنج گۆلایە، هێرشبەرێ ئەلقاسم ئەلحارس حاتەم چار گۆل هەنە، پیشەكارێ ئەلكەرمە یێ نێجیری جۆن ئۆكۆلی ژی چار گۆل هەنە، هەر ئێك ژ یاریزانێ كورد و یانەیا زەورا ئیبراهیم غازی، یێ نێجیری و یانەیا دیالا بێنجامین ئكۆرۆنكۆ، یێ جەوییە عەلا عەباس، یێ هەولێرێ شێركۆ كەریم، كوڕێ باژێرێ سێمێلێ و یانەیا نەفت یا بەغدایی ئەحمەد سەبری و یێ نەورۆز مەروان حسێن هەر ئێكی سێ گۆل هەنە.
