یاریێن دهۆكێ د فینالا كۆپا كەنداڤی دا هاتنە دیار كرن
فدراسیۆنا فوتبۆلا كەنداڤی ب فەرمی هەردو یاریێن دووماهییا كۆپا كەنداڤی ل سەر ئاستێ یانەیێن قارەمان دیار كرن ئەوا تیما دهۆكێ وەكو نوونەرا كوردستانێ و ئیراقێ بۆ جارا ئێكێ یە د دیرۆكا ئیراقێ دا دەربازبوویە فینالێ.
ل دووڤ خشتەیێ هاتیە بەلاڤكرن، یارییا ئێكێ یا چوونێ ژ فینالێ تیما یانەیا دهۆك دێ ل هەشتی نیسانا بهێت ل وەلاتێ كوێتی بیتە مێڤانا یانەیا ئەلقادسیە، یارییا دویێ و یا چارەنڤیس دێ ل یاریگەها خوە ل 15ێ هەمان مەهـ مێڤاندارییا یانەیا كوێتی كەت.
دەربازبوونا دهۆكێ بۆ فینالێ
كاروانێ تیما دهۆكێ د كۆپایێ دا بڤی ڕەنگی بوو، د چارچووڤەیێ كۆما ئێكێ دا ل رێزا دویێ هاتبوو ب كۆمكرنا نەهـ خالان ژ دو سەركەفتن، سێ وەكهەڤی و خوسارەتیەكێ، دەربازبوو قۆناغا پێش دووماهیێ و دو یاری بەرانبەر یانەیا ئیتفاق یا سعۆدیێ كرن و شیا د هەردو یاریێن خوە یێن چوونێ و هاتنێ ب گۆلەكێ دو سەركەفتنان بینت و دەربازبتە فینالا كەنداڤی.
دداخویانیەكێ دا جاسم محەمەد حاجی ڕێڤەبەرێ تیما دهۆكێ ئەوچەندە دیار كر كو دێ هەموو بزاڤان كەن ب باشترین شێوە بەرهەڤی بۆ هەردو یاریێن فینالێ بكەن و گۆت: ئەم یێ د قۆناغەكا دیرۆكی دا و گەشبینن دلێ جەماوەرێ خوە خوەش بكەین و ناسناڤەكێ دیرۆكی و مەزن بۆ یانەیا دهۆك و كوردستانێ و ئیراقێ بینن كو دبیتە ئێكەم جار، دێ پلانێن تایبەت هەبن كو تیما مە بۆ هەردو یارییان بەرهەڤبن.
بۆ زانین خودانا ناسناڤێ قارەمانییا كۆپا كەنداڤی دێ سێ ملیۆن دۆلاران وەرگریت وەكو خەلاتكرن، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ قارەمانیێ دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
