یاریێن ڤێ گەڕێ دێ چارەنڤیسێ یانەیێن پارێزگەهێ دیاركەت
قەیس وەیس:
فدراسیۆنا فوتبۆلا كوردستانێ بڕیار دا یاریێن گەڕا 16ێ ژ خولا پلا نایابا كوردستانێ بۆ سوبەهی بهێنە پاشئێخستن دەرئەنجامێ سەقایێ نە ئارامی د دەڤەرێن جودا دا، ئەوا د هاتە چاڤەڕێ كرن ئەڤرۆ هاتبا كرن كو تێدا پێنچ یانەیێن پارێزگەهێ پشكدارن دناڤبەرا هەڤڕكیێ بۆ پلێتا دەربازبوونێ و مانا خوە د خولێ دا.
دهۆك پلێتا دەربازبوونێ دڤێت
بڕیارە سوبەهی تیما یانەیا دهۆك ل یاریگەها خوە یانەیا زانكۆیا جیهان مێڤان بكەت، ئەلهۆیێن چیا ب هیڤیێن مەزن چاڤ ل سێ خالایە ژبۆ دەستڤە ئینانا پلێتا دەربازبوونێ ئەوا د نوكە دا ل ڕێزا سێیێ ب كۆمكرنا 23 خالان دهێت ژ شەش سەركەڤتن و پێنچ وەكهەڤی و سێ خوسارەتیان، ئەڤ ڕێزبەندییە بۆ دهۆكییان نموونەیە و دێ بزاڤێ كەت پارێزیت پێخەمەت ڤەگەڕاندنا هیڤیێن خوە پشتی دووركەڤتنا سێ وەرزە ل دووڤ ئێك، یارییا دووماهیێ یا دهۆكێ دێ ل حەفتییا بهێت بیتە مێڤانا یانەیا شەقلاوە ل هەولێرا پایتەخت.
سێمێلێ ژی دەربازبوون دڤێت
ژلایێ خوە تیما یانەیا سێمێل دێ ل یاریگەها یانەیا زاخۆ مێڤاندارییا یانەیا كۆیە كەت د گرنگترین یاری دا و دێ هێتە هژمارتن یا دیرۆكی، هەرچەندە كوڕێن دەشتا دوبانێ ل رێزا پێنجێ دهێن ب كۆمكرنا 21 خالان ژ پێنچ سەركەڤتن، شەش وەكهەڤی و دو خوسارەتییان لێ هێشتا دەلیڤەیا دەربازبوونێ ل بەر دەست هەیە و هیڤیێن وێ ماینە، ژبەركو سێ خالێن هەلاویستی دگەل ڕانیە هەنە، ئەوا یارییا وان نیڤا ئێكێ ب دووماهی هاتی ب گۆلەكێ بۆ سێمێلێ نیڤا دویێ نەهاتە كرن ژبەركو راهێنەرێ رانیە هێرشی دادڤانی كربوو و یاری هاتبوو ڕاوەستاند، دووڤدا فدراسیۆنێ ئەو ڕاهێنەر سزادیە و بڕیاردایە نیڤا مایی بهێتە كرن.
بەردەڕەش مانا خوە پاراستیە
یانەیا سێیێ یا پارێزگەهێ بەردەڕەش ئەوا دێ ل یاریگەها خوە یانەیا سۆران مێڤان كەت، هەرچەندە یانەیا پارێزگەهێ جهێ خوە د ناڤ خولێ دا پاراستیە ئەوا ل ڕێزا نەهێ دهێت ب كۆمكرنا 18 خالان ژ چار سەركەڤتن، شەش وەكهەڤی و چار خوسارەتی هەنە، بۆ وە ئەڤ یارییە گرنگە ژبۆ فەرمیكرنا مانا خوە د خولێ دا، یارییا گەڕا 17ێ و دووماهیێ ژ خولێ دێ بیتە مێڤانا چەمچەمال، ژ هەردو یارییان پێدڤی ب سەركەڤتنەكێ یە ژبۆ مسۆگەركرنا مانا خوە بێ چاڤەڕێ ئەنجامێن یاریێن دی بیت.
شێخان و تەناهی ل بن گەڤێن داكەڤتنێ دانە
یانەیا تەناهی ئەوا ل بن كەڤێن داكەڤتنێ دێ ل یاریگەها زانكۆیا دهۆكێ مێڤاندارییا یانەیا چەمچەمال مێڤان كەت، تەناهی ئەوا ل ڕێزا 16ێ و بەری دووماهیێ دهێت ب كۆمكرنا 13 خالان ژ سێ سەركەڤتن، چار وەكهەڤی و حەفت خوسارەتیان، هیچ بژاردەیەك نینە ژبلی سەركەڤتنێ ژبۆ گەشكرنا هیڤیێن مانێ، یارییا دووماهیێ و گەڕا 17ێ دێ ل كەركووكێ بیتە مێڤانا شۆرجە د یارییەكا ڤەبر دا.
ژلایەكێ دووڤە یانەیا شێخان دێ ل باژێرێ سلێمانیێ بتە مێڤانا یانەیا بابان د یارییەكا گرنگ دا، شێخان ل ڕێزبەندییا 17ێ و دووماهیێ دهێت ب كۆمكرنا 12 خالان ژ دو سەركەڤتن، شەش وەكهەڤی و شەش خوسارەتی هەنە، ئانكو ترسا داكەڤتنێ زوورە ل سەر، لێ سەركەڤتن دبیت دەلیڤەكا دی بدەتێ، یارییا دووماهییا خولێ دێ ل یاریگەها خوە یانەیا بازیان مێڤان كەت.
ژ یاریێن دی یێن ڤێ گەڕێ، ئارارات- شەقلاوە، یاریگەها ئارارات، خاك- هەولێر، یاریگەها خاك، بازیان- شۆرجە، یاریگەها شۆرجە.
هەلوەستێ گشتی یێ خولێ
1- شەقلاوە 33 خال.
2- بابان 28 خال.
3- دهۆك 23 خال.
4- زانكۆیا جیهان 22 خال.
5- سێمێل 21 خال.
6- هەولێر 19 خال.
7- چەمچەمال 18 خال.
8- بازیان 18 خال.
9- بەردەرەش 18 خال.
10- كفری 18 خال.
11- كۆیە 16 خال.
12- ئارارات 16 خال.
13- شۆرجە 15 خال.
14- خاك 15 خال.
15- سۆران 14 خال.
16- تەناهی 13 خال.
17- شێخان 12 خال.
هەژی گۆتنێ یە هەمو یاری دێ ل دەمژمێر سێیێ ئێڤاری هێنە كرن، ئەوا 17 یانە پشكدارن ، چار یانەیێن رێزێن پێشیێ دێ پلێتا دەربازبوونێ بۆ نایاب وەرگرن، چار یانەیێن دووماهیێ دێ پاشڤەچنە پلا دو، بۆ زانین فدراسیۆنا فوتبۆلا كوردستانێ بڕیار دایە هەموو یاریێن مایی ژ خولێن پلا نایاب و ئێك بێ ئامادەبوونا پشتەڤانان بیت ئەڤچەندە ژی ژبەر بەرژوەندییا پاراستنا گیانێ پشتەڤانان، ژبەر كاودانێن نوكە دەڤەر تێدا دەرباز دكەت.
