یاریەكا سیاسی یە یا بێ ڤارە و بێ دادڤانە
بێوار ئیبراهیم
ماوەیەكێ درێژە ل كوردستانێ پرۆژەیێ چاكسازی هاتیە راگەهاندن و حوكمەتا هەرێمێ سۆزا چارەسەركرنا زۆر ژ ڤان ئاریشەیێن هەرێمێ دابوو و بەرنامەكێ چار سالی بۆ دارشتبوو، نابێژم ئەو بەنارمە هەمی جێبەجێ بوو، بەلێ هەتا رادەیەكێ باش كۆنترولا بەشەك ژ كێماسی هاتنە چارەكرن و رێك ل زۆر گەندەلیا هاتەگرن و یا راست خەلكی ژی ئۆمێدەكا مەزن ب كابینەیا بۆری هەبوو، بەس ژبۆ وێ چەندێ خەلكی زێدەتر باوەری ب حوكمەتا خۆ هەبیت دڤێت هندەك ژبەر برنا سەروەت و سامانێ ڤی وەلاتی بهێنە دادگەهكرن. دا دەهۆل قوتێن بەغدا ژی نەشێن ل سەر لێدانێن خۆ یێن خراب ل دژی پارتەكا دیار و دژی حكومەتا هەرێما كوردستانێ بەردەوام بن.
بەلێ د هەمان دەمدا ئەم سەحكەینە حوكمەتا خۆ ژ گەلەك پارت و سیاسیان پێكهاتبوو و هەمیان پێكڤە ب بەرنامە سۆزا چاكسازی و گورانگاریان دابوو خەلكێ خۆ بەلێ هندەك كەسانێن بەرژەوەندیخواز ئێك پێنگاڤ ژی نەهاتنە پێش و ڤیان شكەستنێ ب كابینەیا بۆری بینن و هندەك گۆتنێن تەیسۆك و پری بهارات ل بانگەشا دەنگدانێن بۆری دا ب خۆ بكارئینان خۆ وەكی حزبێن ئۆپزسیۆن نیشانی خەلكی دا. و پشتی دەنگدان خلاسبووی كارێن وان ژی خلاس چ رەنگان ل سەر ئاریشەیێن خەلكی و مووچە خۆران ناهێنە دەنگ و وەكی یا دیار دەما نێزیكی دانا مووچەی دبیت ئاریشەیێن بەردەوام ژبۆ مووچەخۆران دروست دبن، هەر وەكی ئەڤە چەندین سالە ژلایێ هەردو حوكمەتان ڤە ڤە ئاریشە بۆ مووچەخۆرێن هەرێمێ دروست دبن، بەلێ بۆ ئەڤ سالە رێكەفتن د ناڤبەرا هەردو حوكمەتان هاتبووكرن ب رێكەكا یاسای ئێدی مووچە و شایستەیێن خەلكی نەبنە یاریێن سیاسیان، ئەو ژی ب رێكا دادگەها فیدرالی ل بەغدا، بەلێ دیسا بابەتێ دان و نەدانا مووچەی یێ گەرمە. بەلێ د ڤی حالەتی دا یا جهێ دلگرانیێ مە جۆرەكێ مرۆڤان هەنە، هەكە مووچە بهێنەدان ژی بەردەوام دبێژن ب خێرا بەغدا ئەڤ جارە ژی مە مووچێ خۆ وەرگرت و هەكە مووچە گیرۆبوون، هەمی نڤیسینێن وان ئاراستەی لایەنەكێ دیاركرینە و گازیا خۆ دگەهینە وی لایەنی،
و ئەز پشتراستم هندەك حەزناكەن ئاریشەیا مووچەی چارەسەر بیت دا بەردەوام ڤی بابەتی بۆ خۆ بكاربیـنن و یا رۆنە وەكی هەیڤا چاردە شەڤێ ئەو ئیراقا نوكە و ژ نشكەكێ ڤە دبێژیت ئێدی چ پشكا هەرێمێ نەمایە ل دەف مە، بابەت سیاسییە، چونكی یا رەوا نینە دەمی دانا مووچەی بیت ئەڤ بابەتە سەرهلدەن و بزانن ئیراقەكا شۆفێنی و شیعەگەری یا دەستێ ئیرانێ دا چو جار ناهێلیت كورد بگەهنە ئارمانجێن خۆ، چونكی وان هەولا پێشكەفتنا خۆ نەداینە بتنێ هەولێن وان ئەون كورد نەگەهنە ئارمانج و مافێن خو یێن رەوا، لەوا دڤێت دەسهەلاتدارێن هەرێمێ و هەمی پارتێن سیاسی ببنە ئێك هەلوەست و خۆ بكەنە خودانێن ئێك گۆتارا سیاسی ل بەغدا دا بشێن فشارێن مەزن بێخنە سەر بەغدا، چونكی 59 پەرلەمانتارێن كورد مە هەنە و ل گەل كۆمەكا وەزیران و سەرۆك كۆمارێ ئیراقێ و رێژەكا دیار یا بەرپرسێن سەربازی ژی كوردن و چەندین رێڤەبەر و راوێژكارێن بەغدا كوردن و هەكە بەغدا هەر ل سەر ڤێ یاریا خۆ یا سیاسی یا بەردەوام بیت، دڤێت كورد خۆ ژ رێڤەبرنا دەولەتێ ڤەكێشن و نابیت كورد پشكداریێ د هەلبژارتنێن داهاتی یێن ئیراقێ دا بكەن و رێكێن دیبلۆماسی ل سەر ئاستێ جیهانێ بگرنەبەر،
و ئەز هیڤیخوازم ئەڤ خالێن من ئاماژە پێ داین، ل دەف كوردان هەبن دا چینا هەژارا نەبنە قوربانی ڤان جۆرە ململانەیێن سیاسی و كوردێن راستەقینە ژی ب هەلوەست بەرامبەر ڤان جۆرە پێشێلكاریان ل گەل بەغدا رابوەستن.
