یانا باتیفا:رێڤه‌به‌رێ گشتی یێ وه‌رزشی سۆزێن خوه ب جهـ نه‌ئیناینه
زاخۆ،عه‌لی حاجی
د داخویانیه‌كێ دا سه‌روكێ یانا باتیفا یا وه‌رزشی بۆ رۆژناما ئه‌ڤرۆ دیاركر هه‌تا نوكه چه‌ندین سۆز ب وان هاتینه دان لێ نه‌هاتینه جێبه‌جێ كرن و هه‌تا نوكه وان ژوره‌ك ژی نینه بۆ برێڤه‌برنا كاروبارێن یانێ و ئێك دینار ژی د قاسا یانێ دا نینه.
زێده‌تر ئه‌یهه‌م جامی گۆت: پشتی بڕیارا دامه‌زراندنا یانا باتیفا یا وه‌رزشی هاتیه دان كو لدووڤ هیڤی و داخازیا وه‌رزشڤانێن ده‌ڤه‌رێ بوویه و سۆزێن ژلایێ شاكر ئه‌حمه‌د سمۆ رێڤه‌به‌رێ گشتی یێ وه‌رزشا هه‌رێما كوردستانێ كو دابینكرنا باره‌گایه‌كێ تایبه‌ت بۆ یانێ و خه‌رجكرنا نسریه‌كا هه‌یڤانه بۆ كاروچالاكیان لێ هه‌تا نوكه چو سۆزه‌ك بجه نه‌ئینایه و قاسا یانێ یا ڤالایه و ئێك دینار ژی تێدا نینه، هه‌روه‌سان مه داخازا كۆمبوونه‌كێ ل گه‌ل سه‌رپه‌رشتێ ئیدارا سه‌ربه‌خۆیا زاخۆ كریه و چاڤه‌ڕێ ده‌لیڤه‌كێ نه ژبۆ گه‌نگه‌شه ل سه‌ر بابه‌تێ یانێ، ژبه‌ركو بڤان كاودانا دێ كارتیكرنه‌كا نه‌رێنی ل سه‌ر چالاكیێن مه كه‌ت و ده‌ستپێكه‌كا لاواز بیت، له‌ورا هیڤییا مه ئه‌وه پالپشتی خه‌ونێن لاوێن ده‌ڤه‌رێ بن.
ژلایه‌كێ دووڤه ناڤهاتی ئه‌وچه‌نده ژی دیاركر كو یاریگه‌ها وان یا ته‌پا پێی چه‌ند كێماسی د ناڤ دا هه‌نه ژوانا فریزه‌یێ یاریگه‌هێ پێدڤی ب سه‌خبیریێ یه و رووناهیا وێ ژ كار كه‌ڤتیه و گۆت: سه‌رباری ئه‌ڤان هه‌موو ئاسته‌نگا مه ده‌رگه‌هێ یانێ نه گرتیه و به‌رده‌وام كار دكه‌ین و پێنگاڤا ئێكێ مه گرێبه‌ست ل گه‌ل ده‌سته‌كا راهێنه‌ران و دیسان ل گه‌ل 30 یاریزانان ئیمزاكرینه ژبۆ خوه به‌رهه‌ڤكرن بۆ وه‌رزێ نوو یێ خولا پلا دو یا كوردستانێ، بۆ زانین هه‌موو ژی خوه به‌خش دێ ل گه‌ل مه بن سه‌رباری ئه‌ڤه ژی نابیته چاره‌سه‌ری ژبه‌ركو یاریزان و راهێنه‌ر پێدڤی ب ده‌رمالێن هاتن و چوونێ نه و دڤێت چه‌ند پێدڤیێن تیمێ ژی بۆ وان بهێنه دابینكرن.
