یانا ته‌ناهی دێ ب هێزا گه‌نجا ڤه‌گه‌ڕیێت
ئه‌ڤرۆ،
د داخویانیه‌كێدا سه‌رۆكێ یانا ته‌ناهی بۆ رۆژناما ئه‌ڤرۆ دیاركر كو وه‌رزێ نوو یێ خول و قاره‌مانیێن هه‌رێما كوردستانێ بۆ تیما مه یا ته‌پا پێی دێ ب هێزه‌كا نوو یا گه‌نجان ڤه‌گه‌ڕیێت و كادرێ نوو ژی هاتیه ده‌ستنیشانكرن و چاڤه‌ڕێ یه ل شه‌مبیا بهێت یاریا خوه ژ قاره‌مانیا هه‌رێمێ دا مێڤانداریا چه‌مچه‌مال بكه‌ت.
زێده‌تر جاسم شه‌عبان گوت: پشتی چه‌ند كۆمبوونێن جودا یێن كارگێریا یانێ و ژبه‌ر ره‌وشا دارایی یا لاواز بڕیار هاتیه دان كو شێوازێ پشكداریا مه بۆ چالاكیێن وه‌رزێ نوو یێ خول و قاره‌مانیێن هه‌رێما كوردستانێ بۆ یاریا ته‌پا پێی جودا بیت و ب هێزا گه‌نجێن باژێرێ دهۆكێ، سێمێلێ و یاریزانێن ته‌ناهی بن هه‌روه‌سان كادره‌كێ نوو یێ به‌روه‌خت پێكهاتیه ژ دیار مه‌هدی راهێنه‌ر، هه‌لكه‌فت عسمه‌ت هاریكار كو دێ سه‌رپه‌رشتیا تیما مه یا ته‌پا پێی بۆ قاره‌مانیا كوردستانێ كه‌ن.
ژلایه‌كێ دووڤه ناڤهاتی ئه‌وچه‌نده ژی دیاركر كو یانا ته‌ناهی یا لبن گڤاشتنێن دارایی و نه‌بوونا یاریگه‌هه‌كا ته‌پاپێی یا تایبه‌ت ئه‌ڤچه‌نده ئاسته‌نگن كه‌ڤنه د رێكا مه دا سه‌رباری پێنگاڤێن هاتینه هاڤێتن بۆ چاره‌سه‌ریێ‌َ ئه‌وژی ده‌م پێ دڤێت لێ ب هه‌موو شیانێن خوه كاردكه‌ین ژبۆ سه‌ركه‌فتنا تیمێن مه د هه‌ر قاره‌مانیه‌كێ دا، هیڤییا مه ئه‌وه پشته‌ڤانیا یانا ته‌ناهی بهێته كرن ژبه‌ركو یانه‌كا نوو یه و خه‌ما وێ پێشئێخستنا وه‌رزشا پارێزگه‌هێ و پشته‌ڤانیا گه‌نجێن ده‌ڤه‌رێ یه.
