یانا زاخۆ: ل ده‌ستپێكا سالا نوو چاڤه‌ڕێ گوهۆڕینان بن
زاخۆ، عه‌لی حاجی:
د داخویانیه‌كێ دا سكرتێرێ یانه‌یا زاخۆ بۆ رۆژناما ئه‌ڤرۆ دیاركر ئه‌و هه‌ست ب ئێشانێ دكه‌ن ده‌مێ ئه‌نجامێن تیما وان یا ته‌پا پێی د خولا ئیراقێ دا دباش نه‌بن و بوو قۆناغا دویێ دێ گه‌له‌گ گوهۆڕین هێنه كرن.
زێده‌تر هشیار شه‌هباز گۆت: ژبه‌ر ئه‌وان ئه‌نجامێن لاواز یێن تیما مه د خولا پلا نایابا ئیراقێ دا كارگێریا یانێ كۆمبوونه‌ك ئه‌نجامدایه و بڕیار هاتیه دان ئه‌ڤرۆ پرێس كۆنفرانسه‌كێ دانۆستاندنێ ل گه‌ل جه‌ماوه‌رێ نه رازیبوون بكه‌ین دا ژبۆ نێزیك ئاگه‌هداربن ل سه‌ر گازنده و داخوازیێن وان، بێگۆمان پێشتر ل گه‌ل راهێنه‌رێ تیمێ كۆمبووینه ئه‌و جهێ مه لاوازی هه‌یی هاتینه ده‌ستنیشانكرن، ژبه‌ركو د قۆناغا نوكه دا ئه‌م نه‌شێن چو یاریزانان ل سه‌ر تیمێ زێده‌بكه‌ین و پێدڤییه جه‌ماوه‌ر ڤێ چه‌ندێ بزانن، لێ ده‌ستپێكا سالا نوو چاڤه‌ڕێ گوهۆڕینان بن پشتی ده‌رگه‌هێ ڤه‌گۆهاستنا زڤستانێ بهێته ڤه‌كرن، دێ چه‌ند گوهۆرینان دناڤ تیمێ دا كه‌ین و هێلا هێرشبه‌ریێ باشتر لێبكه‌ین، لێ یا گرنگ دڤێت ئه‌م هه‌موو پشته‌ڤان بین دا كۆ ڤێ قۆناغا هه‌ستیار ده‌ربازبكه‌ین.
ل دووماهیێ ناڤهاتی گۆت: وه‌كو كارگێریا یانێ ئه‌م هه‌موو بێ به‌رامبه‌ر و خوه‌به‌خش كار دكه‌ین و مه ڤیانه‌كا تایبه‌ت بۆ یانا زاخۆ هه‌یه و ژ جه‌ماوه‌ری دل نه‌ره‌حه‌ترین هه‌مبه‌ری ئه‌نجامێن لاواز و هه‌كه د قۆناغا دویێ دا مه گوهۆڕین نه كرن وی ده‌می دا جه‌ماوه‌ری مافێ هه‌یی ره‌خنێ لمه بكرن.
