یانا زاخۆ گه‌فان ل یاریزانێن خوه دكه‌ت
ئه‌ڤرۆ،عه‌لی حاجی:
سه‌رۆكێ یانا زاخۆ یا وه‌رزشی دیاركر ئه‌و ب هیچ ره‌نگه‌كی ژ ئه‌نجامێن تیما خوه یا پشكدار د خولا پلا نایابا ئیراقێ یا ته‌پا پێی دا رازینینن و دووماهی ده‌لیڤه بۆ راهێنه‌ر و یاریزانێن خوه دایه بۆ باشتكرنا ئاست و ئه‌نجامان.
زێده‌تر د داخویانیا خوه دا بلند شه‌فیق بۆ رۆژناما ئه‌ڤرۆ گۆت: ژبه‌ر ئه‌نجامێن لاواز یێن تیما مه تایبه‌ت د یاریێن بوری دا هاتینه پێش و هه‌كه ئه‌م هه‌لسه‌نگاندنێ بكه‌ین د ناڤبه‌را قۆناغا ئێكێ و دویێ دا ئاست و ئه‌نجام باش نینن وه‌كو یێن قۆناغا ئێكێ سه‌رباری هه‌ر تشته‌كێ پێدڤی بۆ تیمێ هاتیه ته‌رخانكرن، له‌ورا وه‌كو كارگێریا یانێ هوشداریێ دایه یاریزان و كادرێ راهێنانێ كو بۆ هه‌ردو یاریێن بهێت ل گه‌ل ته‌له‌به و كاره‌با ئه‌نجام باش نه‌بن دێ رێژا 30% ژ مووچێ وان هێته كێمكرن و دێ كادرێ راهێنانێ هێته دوورخستن ئه‌وێن مه تێبینی ژی ل سه‌ر هه‌نه.
هه‌روه‌سان ناڤهاتی دیاركر دبیت راهێنه‌ری ژی ئاخفتنا خوه هه‌بن كو د ده‌مێ راوه‌ستیانا خولێ چو كه‌مپێن راهێنانێ بۆ تیمێ نه هاتبوونه رێكخستن دیسان چه‌ند یاریزانێن خوه بۆ تیما خولا هه‌رێمێ هنارت بوون، له‌ورا مه ده‌لیڤه دایه راهێنه‌ری ژی كو د ڤان هه‌ردو یاریان دا دڤێت ئه‌نجام باشبن و خوساره‌تیا مه ل گه‌ل دیوانیه نه چاڤه‌ڕێكری بوو و به‌ر عاقل نه‌بوو.
