یانا گاره ژ بڕیارا خوه لێڤه‌بوو
ئه‌ڤرۆ،
پشتی ب شێوه‌كێ فه‌رمی ژلایێ كارگێریا یانا گاره هاتیه راگه‌هاندن ئه‌وان بڕیاردا دابوو كو تیما خوه یا فۆتسالا كچان ژ هه‌ڤڕكیێن خولا پلا نایابا كوردستانی ڤه‌كێشن ئه‌وا بڕیاره هه‌ڤڕكیێن وێ ل پێنجێ ڤێ هه‌یڤێ بهێنه كرن، دوهی ڤه‌گه‌ڕیانا خوه بۆ خولێ دووپاتكر و ژ بریارا خوه لێڤه‌بوون دیسان ل گه‌ل تیما خوه یا فۆتسالێ كۆمبوون پشتی لایه‌نه‌كی پشته‌ڤانیا خوه یا دارایی بۆ دیاركری.
لدور ڤێ یه‌كێ شێروان به‌شار سه‌رۆكێ یانا گاره یا وه‌رزشی بۆ رۆژناما ئه‌ڤرۆ گوت: هه‌رچه‌نده ده‌ستپێكێ مه گه‌له‌ك بزاڤ دكرن كو ئه‌م نه‌گه‌هینه وێ یه‌كێ بڕیارا خوه ڤه‌كێشانێ ژ خولا فۆتسالا كچان رابگه‌هینین و پێ نه‌خووش بووین ژبه‌ركو مه گه‌له‌ك ده‌رگه‌ه قۆتان بۆ پشته‌ڤانیێ و نه‌بوونا هۆله‌كا گرتی یا راهێنانێ و ئه‌نجامدانا یاریان كو به‌ری نوكه ل هۆلا گرتیا چالاكیێن وه‌رزشی دهاته‌كرن ئه‌وا د نوكه دا بۆ رێڤه‌به‌ریا ساخله‌میێ هاتیه دابینكرن ژبۆ دانانا ڤاكسینا دژی ڤایرۆسێ كورۆنایێ و ژبه‌ركو ئاریشا مه‌زن نه‌بوونا جهی یه لێ پشتی لایه‌نه‌كی خوه ل تیما مه كریه خودان بۆ پشته‌ڤانیا دارایی و دیسان پێخه‌مه‌ت پووته‌دان ب یاریزانێن كچ یێن تیمێ ئه‌م ژ بڕیارا خوه لێڤه‌بووین، بتنێ ئاریشا مایی یا نه‌بوونا هۆلا ئه‌نجامدانا یاریا و راهێنانا یه له‌ورا ب هیڤی نه ئه‌ڤ ئاریشه ژی چاره‌سه‌ربیت دا بشێن پشكداریه‌كا سه‌رفه‌رزا د خولێ دا بكه‌ین.
