یانه‌یا ئافره‌تێن دهۆك مالا وه‌رزشڤانێن كچه و بێ پشته‌ڤانییه
یانه‌یا ئافره‌تێن دهۆك
مالا وه‌رزشڤانێن كچه و بێ پشته‌ڤانییه
محه‌مه‌د عه‌لی نوری
پێنه‌ڤێت وه‌رزشا كچان دهێته هژمارتن ئێك ژ گرنگترین بزاڤێن وه‌رزشى یه ل ده‌ڤه‌رێ و نه بتنێ وه‌كو چالاكییه‌كا وه‌رزشى دهێته دیتن، به‌لكۆ دبیته نموونه‌یا ئازادیێ و بێ جوداهی دناڤبه‌را وه‌رزشڤانێن كوڕ و كچ دا و زێده‌تر باوه‌ری بۆ وه‌رزشڤانا كچ دهێته دان ژبۆ ئه‌نجامدانا وه‌رزشێ، ئه‌ڤچه‌نده ژى ب چه‌ند خاله‌كان ده‌رباز دبیت ژ وانا هه‌ڤكاری و پشته‌ڤانییا خێزانا وێ بۆ ئه‌نجامدانا وه‌رزشێ، دیسان هه‌بوونا یانه‌كا وه‌رزشى بشێت ده‌رگه‌هى بۆ ڤه‌كه‌ت ئه‌و ئاره‌زوو و شیانێن هه‌ین دیاربكه‌ت و یا ژ هه‌موویێ گرنگتر پشته‌ڤانییا حوكمه‌تێ بۆ ئه‌ڤان وه‌رزشڤانێن كچ هه‌تا رۆلێ خوه ببینت، لێ هه‌كه ئێك ژ ڤان خالان په‌یدا نه‌بوو پێنه‌ڤێت كچا وه‌رزشڤان دێ نه‌چاربیت ده‌ستدان ژ هیڤیێن خوه به‌رده‌ت.
ب دیتنا من هه‌تا نوكه حوكمه‌تا هه‌رێما كوردستانێ بزاڤ كرینه كچا وه‌رزشڤان ژى رۆلێ خوه بینت و به‌رانبه‌ر یاریزانێ كوڕ بشێت وه‌رزشا خوه ب ئازادی و هه‌موو باوه‌رییا خوه بكه‌ت، سه‌رۆكێ حوكمه‌تا هه‌رێما كوردستانێ ژى رێزدار مه‌سرۆر بارزانى دۆپاتى ل سه‌ر هه‌بوونا پشته‌ڤانیه‌كا تایبه‌ت بۆ وه‌رزشڤانا كچ بهێته كرن و به‌رده‌وام بوویه ل سه‌ر پشته‌ڤانیێ.
ئه‌وا من دڤێت ب گه‌هینم و دێ ژ مانشێتى گۆتارا خوه ده‌ستپێكه‌م، یانه‌یا ئافره‌تێن دهۆكێ تاكه یانه‌یه ب كچێن وه‌رزشڤان ڤه گرێدایی ئانكو مالا تایبه‌ت یا وه‌رزشڤانێن كچه، لێ ئه‌ڤێ مالێ نه بنگه‌هه‌ك هه‌یه، نه ژێرخانه‌یا وه‌رزشی و نه هۆل و یاریگه‌هـ و هه‌تا چو وه‌به‌رهێنان و داهات ژى نینه، ب تنێ چاڤ ل حوكمه‌تێ هه‌یه هه‌كه پشته‌ڤانی بوو كر ئه‌و باشه هه‌كه نه كر دێ تووشى سه‌د و ئێك ئاریشان بیت و ل دووماهیێ كچێن وه‌رزشڤان دێ بێ ئۆمێدی ل مالا خوه پالده‌ن.
وه‌كو دیار تیما فوتسالا یانه‌یا ئافره‌تێن دهۆك ب كچێن پارێزگه‌هێ و كوردستانى شیان ناسناڤێ خولا فوتسالێ بۆ وه‌رزێ 2023-2024 ب ده‌ستڤه بینن ئه‌ڤچه‌نده ژى هات پشتى پارێزگارێ دهۆكێ د. عه‌لى ته‌ته‌ر بڕیارا پشته‌ڤانیێ بوو دایی، لێ د وه‌رزێ ئه‌ڤ ساله دا ئه‌ڤ یانه كو قاره‌مانا كوردستانێ یه دوباره كه‌ڤتیه ل بن گڤاشتنێن پاراستنا ناسناڤى و نه بوونا پشته‌ڤانییا دارایی كو بشێت پشكداریه‌كا سه‌رفه‌راز بكه‌ت، له‌وما ژى ژبه‌ركو یانه‌یا ئافره‌تێن دهۆكێ نوونه‌را ناڤێ پارێزگه‌ها دهۆكێ یه و یا جوانه پارێزگارێ دهۆكێ پشته‌ڤانییا ڤێ یانێ بكه‌ت هه‌م وه‌كو نوونه‌ر و هه‌م ژبۆ پشته‌ڤانییا كچێن باژێرێ خوه.
