یانه‌یا زاخۆ: ده‌رگه‌هێ ڤه‌گوهاستنێن یاریزانان نه هاتییه گرتن و دبیت گوهۆڕین هەبن
پشتی بۆ ماوه‌یێ زێده‌تری حه‌فتییه ل توركیا تیما ته‌پا پێی یا یانه‌یا زاخۆ كه‌مپا خوه ب دووماهی ئینا و چه‌ند یاریێن هه‌ڤالینی ئه‌نجامدان، دوهی ده‌ست ب یه‌كا راهێنانێ كر ل باژێرێ زاخۆ كر خوه به‌رهه‌ڤكرن بۆ وه‌رزێ نوو یێ خولا ئیراقێ یا پیشه‌كاران.
ل دۆر ڤێ یه‌كێ دلژار عه‌دنان به‌رپرسێ راگه‌هاندنێ و ئه‌ندامێ كارگێرییا یانه‌یێ بۆ رۆژنامه‌یا ئه‌ڤرۆ گۆت: ئه‌نجامدانا كه‌مپێ راهێنانێ مفایێن باش گه‌هاندینه كادرێ راهێنانێ پێخه‌مه‌ت زێده‌تر زالبوون ل سه‌ر ئاست و چه‌سته‌یی یاریزانان، ل دووڤ راپۆرتا راهێنه‌ری كه‌مپه‌كێ سه‌ركه‌فتی بوو نێزیكی 90% ئاستێ و پێكهاتیێ تیمێ ب دووماهی هاتییه و گه‌هشتیه ئاسته‌كێ پێدڤی، پێنه‌ڤێت كادرێ راهێنانێ ب سه‌رپه‌رشتییا راهێنه‌رێ قه‌ته‌ری ته‌لال ئه‌لبلۆشی دۆڤچوونا هێز و كێماسیێن تیمێ كریینه و باشتر دزانن دێ ب چو شێوه چاره‌سه‌ركرن به‌ری ده‌ستپێكرنا وه‌رزێ نوو.
ژلایه‌كێ دووڤه ناڤهاتی گۆت: ده‌رگه‌هێ ڤه‌گۆهاستنا یاریزانان نه هاتییه گرتن كو هه‌تا 15ێ ڤێ هه‌یڤێ یه، له‌وما دبیت گوهۆڕین ژی په‌یدابن ل دووڤ داخوازییا راهێنه‌ری، د نوكه دا تیما مه ب پێكهاتییه‌كێ باشه ژ وانا شه‌ش یاریزانێن خه‌لكێ زاخۆ، دیسان شه‌ش ژ هه‌رێما كوردستانێ و شه‌ش یاریزانێن پیشه‌كار و هه‌می ژی خودان شیان و جهێ باوه‌رییا راهێنه‌ری نه و گه‌شبینن ب پشته‌ڤانییا جه‌ماوه‌رێ یانه‌یا زاخۆ وه‌رزێ بهێت ب هێز ڤه‌گه‌ڕین.
ل دووماهیێ دلزار عه‌دنان گۆت: پشتی ب شێوه‌كێ زانستی هاتینه نووژه‌نكرن یاریگه‌هێن یانه‌یا زاخۆ یا ده‌لال و یا نێڤده‌وله‌تی دێ كه‌ڤیته د خزمه‌تا تیمێ دا بۆ راهێنانان و یاریێن هه‌ڤالینی و دیسان بۆ یاریێن خولا ئیراقێ.
