یانه‌یا زاخۆ ده‌ست ژ كاركێشانا رێڤه‌به‌رێ تیما خوه ڕه‌دكر
ب شێوه‌كێ فه‌رمی كارگێرییا یانه‌یا زاخۆ یا وه‌رزشی ده‌ست ژ كاركێشانا رێڤه‌به‌رێ تیما خوه یا فوتبۆلێ ته‌ها عه‌بدولحه‌كیم ڕه‌دكر و دۆپاتی ل سه‌ر مانا وی دگه‌ل ده‌سته‌كا كادرێ تیمێ كر.
د كۆمبوونا خوه یا نه ئاسایی دا كارگێرییا یانه‌یێ دۆپاتی ل سه‌ر مانا رێڤه‌به‌رێ تیمێ ته‌ها عه‌بدولحه‌كیم كر و دێ به‌رده‌وامبن ل سه‌ر پشته‌ڤانییا وی، د نڤێسارا یانه‌یێ دا هاتییه: ده‌ست ژ كاركێشانا رێڤه‌به‌رێ تیما خوه یا ته‌پا پێی د خولا ستێرێن ئیراقێ دا ڕه‌دكه‌ین ژبه‌ركو د نوكه دا رۆلێ وی یێ كاریگه‌ره دگه‌ل تیمێ و هه‌موو ئه‌ندامێن كارگێریێ د رازی نینن ل سه‌ر ده‌ست ژ كاركێشانا وی.
د داخویانیه‌كا به‌ری نوكه دا بۆ رۆژنامه‌یا ئه‌ڤرۆ دلژار عه‌دنان ئه‌ندامێ ده‌سته‌یا كارگێرییا یانه‌یا زاخۆ دیار كربوو ده‌رئه‌نجامێ ئه‌وان بڕیارێن خه‌له‌ت یێن دادڤانێ یارییا وان زه‌ید سامر به‌رانبه‌ر تیما نه‌جه‌ف كو بوو ئه‌گه‌ر تیما وان ب دو گۆلان به‌رانبه‌ر گۆله‌كێ تووشی خوساره‌تیێ بیت، ئه‌وان سكالا ل سه‌ر دادڤانێ ناڤهاتی تۆماركرییه و ئه‌و نه‌حه‌قییا دژی تیما وان هاتییه كرن نابیت ب سانه‌هی ده‌رباز ببیت و دیاركربوو سەرۆکێ یانەیا زاخۆ عەمار فەرهاد پەیوەندی ب سەرۆکێ فیدراسیۆنا فۆتبۆلا ئیراقێ کریە ل سەر ڤی بابەتی و ئەو ب خوە ژی هاتیە سەر خەت دوپاتی ل هندێ هاتیە کرن کەسێ کەمتەر خەم دێ هێتە سزادان، هەکە خەلەتیێن دادڤانی نەبان یانەیا مە تووشی خوسارەتیێ نە دبوو.
بۆ زانین ل سه‌ر ئه‌وان روودان و خه‌له‌تیێن دادڤانی دژی یانه‌یا زاخۆ رێڤه‌به‌رێ تیمێ ته‌ها عه‌بدولحه‌كیم ده‌ست ژ كارێ خوه كێشابوو.
