یانه‌یا زاخۆ: ٨٠٪ سکالا دێ د بەرژەوەندیا مە دابیت
عەلی حاجی :
د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژناما ئەڤرۆ دیار کر هەمی بەلگەیێن پێدڤی ل بەر دەستێ وانایە و چو تشت وان ژ سکالا وان پەشیمان ناکەت و دێ چاڤەرێ ڤەگەریانا سێ خالان بن.
زێدەتر دلژار عەدنان گۆت: ب ڕێیا پارێزەرێ خوە یێ تایبەت و کەسانێن شارەزا د یاسایێ دا وان سکالا خوە ل سەر فیدراسیۆنا تەپاپێی یا ئیراقێ تومار کریە ل سەر خالێن یاریا دناڤبەرا یانه‌یا زاخۆ و شورتە دا ژبەرکو بریارا دەستپێکێ فیدراسیۆنا ناڤهاتی سێ خال بۆ زاخۆ ڤەگەراندن لێ پشتی دەستوێردانێ ئەو بریار هاتە هەلوەشاندن و جارەکادی خالێن یاریێ بۆ شورتە ڤەگەراندن و سکالا مە ژی ل سەر ڤێ چەندێ یە و ئەم داخازا سێ خالێن یاریێ دکەین و د نوکە دا دادگەها کاس ب شێوەیەکێ فەرمی ل دور سکالا مە،فیدراسیۆنا ئیراقێ ئاگەهدار کریە و داخازا بەلگەیان کریە.
ناڤبری گۆت ژی: دادگەها کاس ب شێوەیەکێ هێدی کارێ خوە دکەت و ئەم پشت راستین دێ بریار د بەرژەوەندیا مه دا بیت و دێ کار کەین هەتا کو بریار ژ دادگەها کاس دەربچیت. و گه‌شبینن هه‌تا ٨٠٪ بریار د بەرژەوەندیا زاخۆ دا بیت و هەمی بەلگەیێن پێدڤی ژی لبەر دەستن ژ بۆ ڕاستیا بابەتی و ڤەگەریانا سێ خالان بۆ یانه‌یا مە و ژبەریا ب دوماهی خولێ دێ بریارەکا ئێکلاکەر هێتە دان.
