یانه‌یێن كوردستانێ پێدڤی ب سه‌ركه‌فتنێ نه ژبۆ باشترنا رێزبه‌ندیا خوه
ئه‌ڤرۆ،
فۆتۆ: هه‌ڤال بریفكانی
دهێته چاڤه‌ڕێ كرن ل ئه‌ینیا بهێت ده‌ست ب یاریێن گه‌ڕا نه‌هێ ژ هه‌ڤڕكیێن قۆناغا ئێكێ یا خولا ئیراقێ بۆ یانه‌یێن پلا نایاب یا ته‌پا پێی بهێنه ئه‌نجامدان، یانه‌یێن دهۆك، زاخۆ و نه‌وروز دێ د ناڤ ئه‌رد و جه‌ماوه‌رێ خوه دا مێڤانداریا یانه‌یێن به‌غدایی و باشۆرێ ئیراقێ كه‌ن و هه‌ولێر دێ به‌ر ب باژێرێ نه‌جه‌فی چیت.
ل رۆژا ئه‌ینیا بهێت تیما یانه‌یا دهۆك ده‌مژمێر 4:15 ل یاریگه‌ها خوه یا سه‌ره‌كی مێڤانداریا یانه‌یا كه‌رخ یا به‌غدایی بكه‌ت د یاریه‌كا پرێ هه‌ڤركی دا ژبۆ ده‌ستڤه ئینانا سێ خالێن یاریێ، ئه‌لهۆیێن چیا ل رێزبه‌ندیا 12ێ ب 11 خالان دهێت ژ دو سه‌ركه‌فتن، پێنچ وه‌كهه‌ڤی و خوساره‌تیه‌ك، كه‌رخ ب هه‌مان خالان ل رێزا نه‌هێ دهێت، دهۆك دێ ب پشتبه‌ستنا جه‌ماوه‌رێ خوه و بلندبوونا ئاستێ یاریزانان گه‌شبینه ڤێ یاریێ ئه‌نجامه‌كێ باش بینت، لێ تیما كه‌رخ ژی یا ب سانه‌هی نابیت بۆ خودانێن ئه‌ردی، ژ یاریێن دی یێن رۆژا ئه‌ینی، نه‌وروز- كاره‌با، دیوانیه- جه‌ویه، زه‌ورا- قاسم، نه‌جه‌ف كه‌ربه‌لا.
شه‌مبیا بهێت یاریێن مایی بڤی ره‌نگی دێ هێنه كرن، یانه‌یا زاخۆ د كاودانه‌كێ هه‌ستیار دا و ئه‌نجامێن خراب دێ مێڤانداریا نه‌فت میسان كه‌ت، كوڕێن خابووری به‌روڤاژی پێشبینیان ل رێزا 17ێ ب پێنچ خالان ژ سه‌ركه‌فتنه‌كێ، دو وه‌كهه‌ڤی و پێنچ خوساره‌تی هه‌نه، لێ نه‌فت میسان 14 خال كۆمكرینه و رێزا حه‌فتێ دهێت، له‌وما یاریه‌كا ب سانه‌هی نا بیت و نه به‌رهه‌ڤبوونا جه‌ماوه‌رێ زاخۆ د ناڤ یاریگه‌هێ دا ژبه‌ر سزایێن ئێكه‌تیا ئیراقێ ل سه‌ر زاخۆ دێ كارتیكرنا خوه ل سه‌ر ئاستێ تیمێ كه‌ت، لێ دڤێت جه‌ماوه‌رێ خوه ئاشت بكه‌ت و ڤه‌گه‌ڕێته سه‌ركه‌فتنان، ژ یاریێن دی یێن رۆژا شه‌مبی، هه‌ولێر دێ بیته مێڤانا نه‌فت ئه‌لوه‌سه‌ت، شورته- نه‌فت ئه‌لبه‌سرا، نه‌فت- ته‌له‌به، سیناعه- حدود.
بۆ زانین جه‌ویه ب 18 خالان سه‌رێ لیستێ دهێت، كاره‌با و نه‌جه‌ف ب 17 رێزێن دویێ و سێیێ، دیسان زه‌ورا و ته‌له‌به ب 16 خالان رێزێن چارێ و پێنجێ ل دووڤ ئێك دهێن.
