یانێن پارێزگه‌هێ هه‌مبه‌ری پێنگاڤا ئێكێ نه بۆ پلێتا ده‌ربازبوونێ
ئه‌ڤرۆ، نه‌وزاد هلۆری.
دهێته چاڤه‌ڕێ كرن ئه‌ڤرۆ هه‌رسێ یانێن پارێزگه‌ها دهۆكێ شێخان، دینارته و باتیفا یاریێن خوه یێن گه‌ڕا ئێكێ یا خولا پلا دویێ ژ قۆناغا دووماهیێ و ده‌ربازبوونێ بۆ پلا ئێكا كوردستانێ یا ته‌پا پێی ئه‌نجامبده‌ن ئه‌وا حه‌فت یانه ژ كۆما ئێكێ هه‌ڤڕكیێ بۆ ده‌ستڤه ئینانا پلێته‌كێ كه‌ن.
ل یاریگه‌ها خوه تیما یانا شێخان دێ مێڤانداریا یانا پێشه‌وا یا هه‌ولێری كه‌ت، ژلایێ خوه‌ڤه یانا خه‌بات یا هه‌ولێری بیته مێڤانا یانا دیناره‌ته، هه‌مبه‌ری وێ ل باژێرێ زاخۆ یانا باتیفا ل یاریگه‌ها خوه یانا زانكۆیا جیهان مێڤانكه‌ت.
بۆ یاریێن قۆناغا دووماهیێ یانا دینارته گرێبه‌ست ل گه‌ل هژماره‌كا یاریزانێن خودان سه‌ربۆر وشیان ئیمزاكرینه ئه‌وژی هه‌ر ئێك ژ نیاز مه‌غدید، كامیران خالد ژ یانێن دهۆك،هه‌روه‌سان عه‌بدولره‌حمان ئێحسان و یاسر ناجی، لدور ڤان گرێبه‌ستا هه‌كار برقی سكرتێرێ یانا دینارته بۆ رۆژناما ئه‌ڤرۆ دیاركر گرێبه‌ستا ئه‌وان یاریزانان بۆ قۆناغا دووماهیێ یا خولێ هاتیه ئیمزاكرن و ئارمانجا مه هه‌ڤڕكیه بۆ پلێتا ده‌ربازبوونێ به‌ره ب پلا ئێك پێخه‌مه‌ت خه‌لكێ دینارته كه‌یفخووش كه‌ین و دیرووكا نوو تۆماربكه‌ین، سه‌رباری مه چو داهاتی نینن بتنێ چه‌ند كه‌سایه‌تێن ده‌ڤه‌رێ و زێباریا و لژنا ناوچا دینارته یا پارتی دیموكراتی كوردستان پشته‌ڤانیا مه دكه‌ن و بۆ یاریا ئه‌ڤرۆ به‌رهه‌ڤین به‌ره ب سه‌ركه‌فتنێ.
بۆ زانین 14 یانه ژ هه‌ر چار پارێزگه‌هێن هه‌رێما كوردستانێ ده‌ربازبووینه قۆناغا دووماهیێ یا پلا دو و هاتینه به‌لاڤكرن ل سه‌ر دو كۆمان، هه‌ر كۆمه‌كێ ئێك تیم دێ ده‌ربازبیته پلا ئێكا كوردستانێ ئه‌وا دێ یاریێن وان بشێوه‌یێ خول ئێك قۆناغ هێنه كرن.