یانێن پارێزگه‌هێ چاڤ ل ناسناڤێ كیك بۆكسینگا ئیراقێ نه
پشتی بۆ ماوێ چار هه‌یڤه ژ به‌رهه‌ڤیان چاڤه‌ڕێ یه سوبه‌هی پێنچ یانێن پارێزگه‌هێ بكه‌ڤنه د هه‌ڤڕكیێن قاره‌مانیا ئیراقێ بۆ یاریا كیك بۆكسینگێ ل سه‌ر ئاستێ كچان و كوڕان ل سنورێ ده‌ڤه‌را هه‌رێما كوردستانێ و باكورێ ئیراقێ ب ئارمانجا ناسناڤی و ب ده‌ستڤه‌ئینانا پلێتا پێكهاتیێ هه‌لبژارتیێ ئیراقێ ئه‌وا دێ ب پشكداریا زێده‌تر 15 یانا ل هۆلا گرتیا یانا دهۆك هێته ئه‌نجامدان.
د داخویانیه‌كێدا مه‌حفوز ئیبراهیم سه‌رۆكێ ئێكه‌تیا كیك بۆكسینگا پارێزگه‌هێ بۆ رۆژناما ئه‌ڤرۆ گوت: هه‌ر پێنچ یانێن دهۆك، زاخۆ، شێخان، ئامێدیێ و ته‌ناهی دێ نوونه‌راتیا پارێزگه‌هێ د قاره‌مانیا ئیراقێ دا كه‌ن لسه‌ر ئاستێ یانێن هه‌رێمێ و باكورێ ئیراقێ بۆ هه‌ردو ره‌كه‌زێن كچ و كوڕ و زێده‌تر 15 یانێن هه‌ولێر، سلێمانی، مووسل و كه‌ركووك به‌رهه‌ڤیا خوه دیاركریه بۆ قاره‌مانیێ ئه‌وا دێ ب سه‌رپه‌رشتیا ئێكه‌تیا كیك بۆكسینگا ئیراقێ ب هه‌ڤكاری ل گه‌ل نوونه‌راتیا دهۆك یا لژنا ئۆلۆمپی دهێته رێخستن و هه‌ر تشته‌كێ پێدڤی بۆ سه‌ركه‌فتنا قاره‌مانیێ هاتیه دابینكرن.
ژلایه‌كێ دیڤه سالح كه‌كو راهێنه‌رێ یانا دهۆك گه‌شبینیا خوه دیاركر كو هه‌ر پێنچ یانێن پارێزگه‌هێ شیانێن هه‌ڤڕكیێ بۆ پلێتا قۆناغا دووماهیێ یا هه‌یی تایبه‌ت سه‌ر ئاستێ كچان كو شیانێن چوونێ بۆ ناڤ رێزێن هه‌لبژارتیێ ئیراقێ دا به‌رده‌ستن و دێ ب هه‌موو شیانێن خوه كاركه‌ین ژبۆ بجهئینانا ئارمانجا خوه و ئه‌ڤه چار هه‌یڤه به‌رهه‌ڤی دهێنه‌كرن و گوت: ژبه‌ركو قاره‌مانیا كچان بوو جارا ئێكێ یه ل سه‌ر ئاستێ ئیراقێ دهێته ئه‌نجامدان ب هیڤی نه ده‌لیڤا زێرین ژ ده‌ست نه‌ده‌ین و بشێن كچێن پارێزگه‌هێ ل سه‌ر ئاستێ ئیراقێ رێزێن ئێكێ ب ده‌ستڤه‌بینن.
