یانەیا ئافرەتێن دهۆك و گارە رێزێن دویێ و سێیێ ل سەر ئاستێ ئیراقێ هاتن
هەردو یانەیێن ئافرەتێن دهۆك و گارە رێزێن دویێ و سێیێ ل سەر ئاستێ قارەمانییا ئیراقێ بۆ یارییا تیكونجتسۆیا واسكی ب دەستڤە ئینان پشتی یاریزانێن وان شیان د ژیێن جودا سەركەفتنێ ل سەر هەڤڕكێن خوە بینن، د هەڤڕكیێن واندا ئەوا ل درەنگییا شەمبییا بۆری ب پشكدارییا 93 یاریزانێن كوڕ و 40 یاریزانێن كچ ژ 10 یانەیان ل هۆلا بنگەهێ لاوێن دهۆك هاتییە كرن.
ل سەر ئاستێ كچان یاریزانێن یانەیا ئافرەتێن دهۆكێ ئەوا ب هەشت یاریزانان پشكداری كرین سەرجەمێ خالێن وان شیان رێزا دویێ بهێن بۆ ژیێن جودا، ئەوا یانەیا تلسقۆف رێزا ئێكێ هاتی و یانەیا سیناعات ئەلحەربییە یا بەغدایی رێزا سێیێ هات،
ل سەر ئاستێ پشكۆژان بۆ كوڕان یانەیا گارە ل رێزا سێیێ هات ئەوا یانەیا ئەلموستەقبەل ئەلموشرق یا مووسلی رێزا ئێكێ هاتی و سیناعات یا بەغدایی رێزا دویێ هاتی، ژلایەكێ دیڤە ل سەر ئاستێ بشکۆژ(براعم) یانەیا شنگال رێزا دویێ و بنگەهێ لاوێن دهۆك رێزا سێیێ و سیناعات رێزا ئێكێ هاتبوو، هەروەسان بۆ ئاستێ تازەپێگەهشتیان كوڕان شنگال رێزا ئێكێ، ئەلموستەقبەل ئەلموشرق رێزا دویێ و یانەیا كورد ئەلفەیلیین رێزا سێیێ هات.
مەحمود ئیبراهیم سەرۆكێ فیدراسیۆنا تیكونجتسۆیا ئیراقێ پەسنا مێڤانداریكرنا دهۆكێ بۆ قارەمانیێ كر و گۆت: ئەم پشت راست بووین كو دێ قارەمانییا مە ب شێوەكێ رێكخستی و گەلەك باش و سەركەفتیانە ب ڕێڤە چیت و بەری نوكە ژی مە گۆت بوو ژێگرتنا باژێرێ دهۆكێ ل سەر ئاستێ هەمی باژێرێن دی یێن هەرێمێ و ئیراقێ بۆ هەردو قارەمانیێن ئیراقێ و نێڤدەولەتی هات ژبەر هەبوونا خالێن سەركەفتنا قارەمانیێ ژ ئۆتێل، هۆلێن وەرزشی، پشتەڤانی و هەڤكارییا بەرپرسێن حكومی و گەشبینن دێ قارەمانییا نێڤدەولەتی ل پارێزگەها دهۆكێ جوانتر و باشتر ژی بڕێڤەچیت.
