یانەیا ئاكرێ 90% بەرهەڤیێن خوە بۆ خولێ ب دووماهی ئیناینە
رەمەزان زەکەریا:
پەیڤدارێ یانەیا ئاكرێ ئاشكرا كر هەتا نوكە ئەوان 90% بەرهەڤی بۆ وەرزێ نوو یێ خولا پلا نایابا كوردستانێ یا تەپا پێی ب دووماهی ئیناینە و گرێبەستا حەفت یارێزانێن پار سال نوو كرینە و دگەل حەفت یاریزانێن رێكەفتی نە، هەروەسان د نوكە دا كار لسەر ئینانا دو یاریزانێن دی ژی دكەین.
زێدەتر سوهەیب عەلی بۆ رۆژنامەیا ئەڤرۆ گۆت: گولپارێزێ یانەیێ ئیرانییە و ل نێزك دێ گرێبەستا هێرشبەرەكێ پیشەكار راگەهینین، مە یاریزانەكێ عەرەب هەیە بەرەڤانیێ یاریێ دكەت لێ ناهێتە هژمارتن پیشەكار، هەموو بەرهەڤی هاتینە كرن و رێژا 90% تیم هاتیە بەرهەڤكرن و چاڤەرێ بریارا فیدراسیۆنا تەپاپێی یا كوردستانێ دكەین بۆ دانانا ژڤانێ خولێ، مە راهێنەر و هاریكارێ وی بەرهەڤن ب تنێ راهێنەرێ گۆلپارێزا مایە دەمەك نزیك دێ بەرهەڤ بیت .
هەروەسان ناڤهاتی گۆت: دێ كەمپەكێ راهێنانێ یا نافخۆیی هەبیت بۆ پتر بەرهەڤكرنا یاریزانان و ئەنجامدانا یاریێن هەڤالینی، هەروەسا ب پشتەڤانییا مەسرور بارزانی سەرۆكێ حوكمەتا هەرێمێ یاریگەها مە دهێتە نوژەنكرن دبیت بۆ دەستپێكرنا وەرزێ نوو بەرهەڤ نەبیت لێ چاڤەرێ دكەین پشتی ئەنجامدانا چەند یاریەكا یاریگەهـ دووماهی بهێت یاری تێدا بهێنە ئەنجامدان .
ل دووماهیێ ژی گۆت: وەرزێ بوری مە گۆت دێ ئاكرێ كەینە هژمارە د خولا كوردستانێ دا مە شیا وێ بجهبینین و بۆ ئەڤسالە دێ هەڤركیێ كەین لسەر رێزبەندیا پێنج یانەیێن سەركەفتی.
