یانەیا بەردەڕەش: قەیرانا دارایی رێگریێ ل چالاكیێن ڤۆلیبۆلێ دكەت
رەمەزان زەكەریا
د داخۆیانیەكێ دا سكرتێریێ یانەیا بەردەڕەش یا وەرزشی ئاشكراكر د دەمەكێ دا كو جەماوەرێ وەرزشی ل بەردەڕەش چاڤەڕێی دەستپێكرنا خۆل و چالاكییێن نوو یێن مە بوون تایبەت د یاریا فۆلیبۆلێ دا، د نوكە دا مە چاڤ ل چو ناسناڤ و چالاكیان نینە، ئەگەرێ سەرەكی ژی دزڤریت بۆ هەژاریا خەزینەیا یانەیێ.
زێدەتر زەهدی عەبدولقادر بۆ رۆژناما ئەڤرۆ گۆت: یانەیا بەردەڕەش پشكداری چ چو چالاكییەكێ ناكەت، ئەڤ بریارە تنێ پەیوەندی ب ئاستێ تەكنیكی یێ یاریزانان ڤە نینە، راستەوخۆ گرێدایی باری دارایی یێ یانەیێ یە.
ناڤهاتی گۆتژی: هەر لڤینەكا وەرزشی پێدڤی ب بۆدجەیەكا دیاركری هەیە و د رەوشا نوكە دا یانە نەشێت چو ئەركێن دارایی یێن تیما فۆلیبۆلێ بگریتە ستۆیێ خۆ، ئەم پشكداری چ چالاكیەكێ ناكەین، بۆ پشكداریكردن د هەر یارییەكێ دا، دڤێت رەوشا ئابووریێ یانەیێ بهێتە پشت راستكرن.
سكرتێرێ یانەیێ خویاكر: راوەستاندنا چالاكییێن وەرزشی ل یانەیەكا خودان جەماوەر وەك بەردەڕەش، دێ بیتە ئەگەرێ سستبوونا لڤینا گەنجان و دووركەفتنا وان ژ گۆڕەپانێن وەرزشی.
