یانەیا دهۆك دێ كەمپەكێ راهێنانێ ل دەرڤەیی هەرێمێ دانیت
د داخویانیەكێ دا رێڤەبەرێ تیما تەپا پێی یا یانەیا دهۆك دیار كر ل دووماهییا ڤێ حەفتیێ تیما وان دێ بەر ب پایتەختێ ئیراقێ بەغدا چیت ژبۆ دانان كەمپەكێ راهێنانێ و مفا ژ راوەستیانا خولا ستێرێن ئیراقێ، ئەڤچەندە هات پشتی فیدراسیۆنا تەپا پێی یا ئیراقێ بڕیار دایی هەڤڕكیێن خولا ستێران بۆ ماوەیێ زێدەتر هەیڤەكێ بهێتە راوەستاندن ژبەر پشكدارییا هەلبژارتیێ ئیراقێ د قارەمانیا كۆپا ئاسیا دا ئەوا نوكە هەڤڕكیێن وێ نوكە ل وەلاتێ قەتەر دهێنە كرن.
زێدەتر جاسم محەمەد حاجی گۆت: ل دووڤ پلانا مە دگەل كادرێ راهێنانێ پێخەمەت باشترین بەرهەڤی بۆ یاریێن بهێت یێن خولێ و مفا وەرگرتن ژ راوەستیانا خولێ بڕیارە ل 20ی ڤێ مەهێ كەمپەكێ راهێنانێ ل بەغدا پایتەختێ ئیراقێ ب دانین كو دهێتە پێشبینیكرن بۆ ماوەیێ دەهـ رۆژان یا بەردەوام بیت و دێ بزاڤێ كەین چەند یاریێن هەڤالینی ل دووڤ كاودانێن وی دەمی ئەنجامبدەین، ئەڤچەندە ژی ژبۆ هندێ یە كو راهێنەرێ مە یێ نوو ئەحمەد خەلەف و هاریكاری وی عەلی وەهیب باشتر نێزیكی یاریزانان و ئاستێ وان و هێز زانین ل سەر كێماسییان ژبۆ چارەسەركرنا وان و بیتە دەلیڤە گۆنجاندنەكا باشتر پەیدابیت و باشتر خوە بەرهەڤ بكەین بۆ خولێ.
هەروەسان ناڤهاتی دیار كر راوەستیانا خولێ دەلیڤەكا باشە بۆ مە و هەمی یانەیان كو دەست ب گوهۆڕینێن باشتر دناڤ ئاستێ تیمێ دا بكەن تایبەت د ماوەیێ ڤەگۆهاستنێن زڤستانێ دا یە و گۆت: دو باشترین یاریزانێن گەنج و خەلكێ پارێزگەهێ و یانەیا دالكۆرد یا سویدی هارۆن ئەحمەد و ئەیسەر قاسم هاتینە دناڤ رێزێن تیمێ دا و دێ بزاڤێ دكەین هێرشبەرەكێ خودان شیان و پیشەكار بینن كو مفایی ژێ وەربگرین، هەروەسان دو یاریزانێن دی یێن خودان سەربۆر و شیان ل سەر تیمێ زێدەكەین ژبۆ چارەسەركرنا كێماسیان تایبەت هێلا بەرەڤانیێ یا لایێ چەپێ.
بۆ زانین پشتی بۆرینا 12 گەڕان تیما یانەیا دهۆك د خولا ستێرێن ئیراقێ دا رێزا پێنجێ دهێت ب كۆمكرنا 18 خالان، ژپێنج سەركەفتن، سێ وەكهەڤی وچار خوسارەتییان.
