یانەیا زاخۆ : 80% سزایێن مە دێ هێنە كێمكرن
ئەڤرۆ
زاخۆ، عەلی حاجی:
د داخویانیەكێ دا ئەندامێ كارگێریا یانەیا زاخۆ یا وەرزشی بۆ رۆژناما ئەڤرۆ دیار كر د ڤێ حەفتیێ دا دێ سزایێ تیما وان ئەوا پشكدار د خولا نایابا ئیراقێ یا تەپا پێی بۆ 80% هێنە كێمكرن .
زێدەتر دلژار عەدنان گۆت: پشتی وان سزایێن نەچاڤەرێكری ژلایێ لژنەیا بەریكانەیان ل ئێكەتیا ئیراقێ ب سەر یانەیا زاخۆ هاتینە راگەهاندن ئی كسەر كارگێریا یانێ نەرازیبوونا خوە بۆ ئێكەتیا ئیراقێ دیار كر ئەو سزایێن هاتینە دانان د دروست نینن و غەدرەكا مەزنە دەرحەقێ یانێ و جەماوەرێ وێ دا، ژبەر كو یاریا بەرانبەر زەورا یاری بێ كێشە ب دووماهی هاتبوو ب رێكسختنەكا سەركەڤتی بوو چو ئاریشە ژلایێ جەماوەرێ یانەیا زاخۆ ڤە نەهاتینە دروست كرن، مە هەمی بەلگەیێن خوە رادەستی وان كرین بۆ وان دیار بوو چو كێشە د دەمێ برێڤە چوونا یاریێ دا دروست نەبوینە و ژبەر هندێ ژی ئێكەتیا ئیراقێ داخاز ژ دەستەیا كارگێریا یانێ كر ب رێیا نڤێسارەكێ داخاز ژ وان بكەن پێداچوونێ د بریارێ دا بكەن دا كو ئەو ژی ژلایێ خوەڤە كار د وی بابەتی دا بكەن و سزا بهێنە كێمكرن.
ناڤبری گۆت ژی: ئەڤرۆ رۆژا دووشەمبێ دێ كومبونا لژنەیا بەریكانەیان یا ئێكەتیا تەپاپێی یا ئیراقێ هێتە سازكرن و دێ پێداچوونێ د بریارا خوە دا كەن و 80% ژ سزایێن سەر یانەیا زاخۆ هێنە كێمكرن بتنێ سزایێ ماددی دێ مینیت كو سێ ملیون دینارێن و جەماوەرێ مە ب شێوەیەكێ جوان و سەردەمانە پشتەڤانی ل تیما خوە كرینە ب باشترین شێوە ژی رێز ل تیما مێهڤان گرتینە .
