یانەیا سێمێلێ ژ دەستدانا هیڤیێن ناسناڤی بەر ب پاراستنا مانا خوە د خولێ دا
چاڤەڕێ دهێتە كرن ئەڤرۆ سێ یاریێن دی ژ هەڤڕكیێن گەڕا 10ێ یا خولا پلا ئێكا كوردستانێ یا فوتبۆلێ بهێنە كرن، یانەیا سێمێل دێ ژ دەرڤەیی یاریگەها خوە بیتە مێڤانا یانەیا كویە د یارییەكا ڤەكری و هەڤركی بۆ سێ خالان، ژ یاریێن دی یێن ئەڤرۆ سۆران دێ مێڤاندارییا شۆرجە كەت، كفری دێ بیتە مێڤانا ڕواندوز ئەوا هەموو یاری دەمژمێر 2:30 پشتی نیڤرۆ هێنە كرن.
ل دۆر ڤێ یاریێ و دەلیڤەیا تیما سێمێلێ د خولێ دا پەروەر حسێن جێگرێ سەرۆك یانەیا پارێزگەهێ بۆ رۆژنامەیا ئەڤرۆ گۆت: یارییا ئەڤرۆ ب سانەهی نابیت بۆ تیما مە ئەوا پرانییا پێكهاتیێ وێ كوڕێن باژێرێ سێمێلێ و یێن گەنجن، پشتی ژ دەستدانا كۆمەكا یاریزانێن خودان شیان و شارەزا ژبەر كاودانێن دارایی كو مە نەشیایی مووچەیێن وان بەرهەڤبكەین، هەرچەندە گەشبینین مانا خوە د خولێ دا پارێزین، لێ هەڤڕكی بۆ سەرێ لیستا خولێ یان پلێتا دەربازبوون بۆ نایابا كوردستانێ گەلەك ب زەحمەت كەڤتییە.
ژلایەكێ دووڤە ناڤهاتی گۆت: پێكهاتیێ مە ب پرانییا كوڕێن باژێرێ سێمێلێ نە و گەنجن دێ پشت گەرمی ب شیانێن وان هەبیت، یا گرنگ دڤی دەمی دا ئەم ئاست و ئارامییا تیمێ پارێزین، ئارمانجا مە ژی نە هێلین د هەر یارییەكێ دا چو خوسارەتییان بدەین بەلكو بتنێ هزرا سەركەفتنا بكەین، هەتا دووماهی چركە و یاری ژی خوە بێ ئۆمێد ناكەین.
بۆ زانین بەری ب دووماهی هاتنا یاریێن گەڕا دەهێ تیما یانەیا سێمێلێ ب كۆمكرنا 11 خالان رێزا نەهێ دهێت ژ سێ سەركەفتن، دو وەكهەڤی و سێ خوسارەتی هەنە، ئەوا یانەیا هەلۆ سەرێ لیستێ دهێت ب19 خالان و دڤێ گەڕێ دا یا چاڤەڕێ یە، ئەوا 15 یانە پشكدارن و یاریێن وان ب شێوەیی خول ئێك قۆناغ دهێنە كرن، دو یانەیێن ئێك و دو دێ دەربازبنە پلا نایاب و دو یانەیێن دووماهیێ پاشڤەچنە پلا دو یا كوردستانێ.
