یانەیا هەولێر دێ خوە سپێرتە راهێنەرەکێ كورد
ئەڤرۆ
ل دووڤ دەنگۆباسێن هاتینە بەلاڤكرن ل هەولێرا پایتەخت كارگێریا یانەیا هەولێر بڕیاردایە بۆ یاریا بهێت ژی ژ چارچووڤێ خولا پلا نایابا ئیراقێ یا تەپا پیێ سپارتا خوە ل سەر راهێنەرێ كورد عەبدولقادر حسێن بكەت دوور ژ هەر ئەنجامەكی.
ل دەستپێكا وەرزێ نوو یێ خولێ یانەیا هەولێر گرێبەست دگەل نزار مەحرۆسی ئیمزاكر بوو لێ پشتی بۆرینا دو یاریان دگەل كەربەلا و كارەبا تووشی خوسارەتیێ بووین دەست بەرداری راهێنەری بوون، دووڤدا گرێبەستێ ل گەل غازی فەهەد ئیمزاكر ئەوێ 13 یاری ب رێڤەبرین، ژبەر بەردەوامیا ئەنجامێن لاواز بتنێ سێ سەركەفتن ئینابوون راهێنەرێ ناڤهاتی ژی دەست ژ كارێ خوە بەردا، یانەیا هەولێر نەچاربوو هاریكارێ راهێنەری یێ كورد عەبدولقادر حسێن ل جهێ وی ب دانیت ئەوێ ژلایێ جەماوەری ڤە پشتەڤانیەكا باش بوو دهێتە كرن، ل دووڤ ژێدەرێن دەست ب رۆژناما ئەڤرۆ كەفتین كو كارگێریا یانەیا هەولێرێ بڕیاردا بۆ یاریا بهێت هەتا قۆناغا ئێكێ ژی ب دووماهی بهێت سپێرتێ ل سەر بكەت و دوور نینە هەكە ئەنجام د باشبن قۆناغا دویێ راهێنەرێ كورد بەردەوامبیت، ئەڤ پێنگاڤە دێ بیتە یا دویێ پشتی یانەیا دهۆكێ هەر ژ دەستپێكا خولا پلا ئێك و هەتا بۆرینا 17 گەڕان ژ خولا پلا نایاب سپارتا خوە ب راهێنەرێ كورد و یێ پارێزگەهێ سلێمان رەمەزان كریە ئەوێ هەتا نوكە ئەنجامێن دلخوەشكەر دەستڤە ئیناینە.
