یانەیێن بەهدینان دێ بەرانبەر هەڤڕكیێن خوە شەڕێ رێزبەندیێ كەن
بڕیارە سوبەهی و ئەینییا بهێت هەشت یاری ژ هەڤڕكیێن گەڕا چارێ یا خولا پلا نایابا كوردستانێ یا تەپا پێی بهێنە ئەنجامدان، هەرسێ یانەیێن بەهدینان د یاریێن ئاگرین دا بەرانبەر هەڤڕكیێن خوە یێن رێزبەندییا خولێ بن ئەوا هەمی یاری دێ ل دەمژمێر دو یێ پشتی نیڤرۆ هێنە ئەنجامدان.
سوبەهی پێنچ شەمبی ل یاریگەها خوە تیما یانەیا ئاكرێ ب ژڤانە بۆ سەركەفتنا دویێ ل دووڤ ئێك پشتی مێڤاندارییا یانەیا هەولێر دكەت ئێك ژ یاریێن بهێز بۆ تیما بەهدینان، ئاكرێ شیایە چار خالان كۆمبكەت و رێزا نەهێ بهێت، بەرانبەر دا یانەیا هەولێر ب هەمان خال زێدەتری سێ گۆلان رێزا حەفتێ دهێت، ئاكرێ ئەوا د یارییا بۆری دا سەركەفتن ل سەر رانیە ئینایی ب گۆلەكێ گەشبینە بەردەوامیێ بدەتە ئەنجامێن خوە یێن باش، لێ بەرانبەر دا هەولێر ژی تیمەكا ب سانەهی نابیت، ژلایەكێ دووڤە تیما یانەیا زاخۆ دێ ل هەولێرا پایتەخت بیتە مێڤانا شەقلاوە د یارییەكا هەڤڕكی دا بۆ رێزبەندییا خولێ، كوڕێن خابووری ب پێنچ خالان رێزا چارێ دهێن ژ سەركەفتنەك و دو وەكهەڤییان دێ بزاڤێ كەت بەر ب پێشڤە بچیت ژبۆ رێزبەندیەكا باشتر، تیما شەقلاوە خودانا چار خالان رێزا شەشێ دهێت، ژ یاریێن دی یێن سوبەهی، شێروانە- چوارقۆرنە، برایەتی- سەید سادق.
ل ئەئینیا بهێت تیما یانەیا دهۆكێ دێ بیتە مێڤانا یانەیا سۆران د یارییەكا دی ب هێز دا، ئەلهۆیێن چیا ئەو سەركەفتنەك و وەكهەڤییەك هەیی ب چار خالان رێزا 10ێ دهێت، د بەرانبەر دا خودانێن ئەردی ژی هەمان خال هەنە لێ زێدەتری سێ گۆلان رێزا هەشتێ دهێت، ئەڤ یارییە بۆ تیما دهۆكێ گەلەك گرنگە پێخەمەت ڤەگەڕیانا ئەنجامێن سەركەفتی و پێشڤەچوون بۆ پلێن باشتر، ژ یاریێن دی یێن رۆژا ئەینی، رانیە- پێشمەرگەیێ هەولێر، سیروانی نوو- دەربەندیخان، ئارارات- هندرین.
