یانەیێن دهۆکێ د ناڤبەرا تەکنیکا یاریگەهێ و داهێنانا کارگێڕی دا
سەرکەفت رشید
گۆتارەکا شیکاری ل سەر بنەمایێ ڤەکۆلینەکا زانستی د جیهانا وەرزشا سەردەم دا، سەرکەفتن ب گۆلەکێ یان برنا یارییەکێ بتنێ ناهێتە پیڤان، بەلکو بنەمایێ سەرەکی یێ هەر سەرکەفتنەکێ، هەبوونا کارگێڕییەکا تۆکمە و داهێنەرە، ل پارێزگەها مە «دهۆکێ»، یانەیێن وەرزشی د قۆناغەکا هەستیار دانە و پێدڤی ب گۆهرینێن بنەڕەتی هەیە دشێوازێ برێڤەبرنا ژێدەرێن مرۆڤی دا و بەلگە ژی لسەر گوتنێن مە ئەڤ ڤەکۆلینا زانستی یا نوو.
نەرمی (Flexibility): کلیلا سەرکەفتنێ یە، ڤەکۆلەران ئاماژە ب وێ چەندێ کریە کو یانەیێن دهۆکێ پێدڤی ب جۆرەکێ «نەرمییێ» نە د مامەلەکرنێ دا. نەرمی نە ب واتایا سستیێ، بەلکو ب واتایا وێ چەندێ کو کارگێڕیا یانەیێ بشێت خۆ دگەل گۆهرینێن بلەز ئانکۆ خێرا یێن وەرزشی و تەکنۆلۆژی بگونجینیت. ئەنجامێن ڤەکۆلینێ نیشان ددەن کو «نەرمیا کارکرنێ» (Practices Flexibility) بهێزترین چەکێ یانەیێن دهۆکێیە بۆ گەهشتن ب گۆپیتکا سەرکەفتنێ یان وەک ڤەکۆلەر دبیژنێ «درەوشانەڤەیا دەزگەهی».
ئاریشە ئانکۆ کێشە ل کیڤەیە؟
تشتێ سەرنجڕاکێش د ئەنجامێن ڤێ ڤەکۆلینێ دا ئەوە کو «نەرمیا رەفتارێ» (Behavior Flexibility) د ناڤبەرا کارمەندێن یانەیان دا وەک پێدڤی نینە. ئەڤە واتەیا وێ چەندێ ددەت کو هێشتا هندەک ژ کارمەندێن یانەیان یان ئەندامێن کارگێڕی ب شێوازەکێ کلاسیک هزر دکەن و زەحمەتە خۆ دگەل رەفتار و گۆهرینێن نوی یێن بازارێ وەرزشی بگونجینن.
پێشنیارێن زانستی بۆ یانەیێن دهۆکێ ژلایێ ڤەکۆلەران سەرکەفت ڕەشید، محەمەد ڕەشید، بێوار محەمەد ڤە هاتینە دیارکرن کۆ چەند رێکارەکن دبنە ئەگەرێ بلندکرنا ئاستێ یانەیان:
* راهێنان نەک تنێ بۆ یاریزانان: پێدڤییە یانە گرنگیێ بدەنە خۆلێن گەشەپێدانێ بۆ فەرمانبەرێن خۆ، دا کو بشێن دگەل هەر ئاریشەکا ژنشکەکێ ڤە سەردەریێ بکەن.
* داهێنان د رێنمایان دا: یانە نەبنە زیندانەک بۆ یاسایێن کەڤن، بەلکو سیستەمەکێ وەسا دابڕێژن کو کارمەند بشێت تێدا داهێنانێ بکەت و هزرێن نوی پێشکێش بکەت.
* گرنگیدان ب پسپۆریێ: وەک د ڤەکۆلینێ دا دیارە، پتریا کارمەندان د بوارێ تەپاپێ دا کار دکەن، لێ پێدڤییە ئەڤ نەرمییا کارگێڕی هەمی یاریێن دی ژی بخۆڤە بگریتە و نە بتنێ تەپا پێی بیت.
ل دووماهیێ فەرە دیار بکەین کۆ وەرزشا دهۆکێ د قۆناغەکێ دایه پێدڤی ب ئەقلەکێ زانستی یە نەک تنێ عاتیفە. ئەڤ ڤەکۆلینا کو ل نیسانا سالا ٢٠٢٥ێ هاتیە بەلاڤکرن، زەنگەکا هشیارکرنێ یە بۆ یانەیێن مە. ئەگەر یانەیێن دهۆکێ دخوازن د جیهانا وەرزشێ دا گەشەیێ بکەن و پێشبکەڤن و بگەهنە ئاستێ یانەیێن پیشەگەر، دڤێت گوهێ خۆ بدەنە ڤەکۆلەرێن زانستی و ژێدەرێن خۆ یێن مرۆڤی ب شێوازەکێ نەرم و سەردەمیانە برێڤە ببەن. چونکی دەبێت بزانن کۆ سەرکەفتن ب تنێ د ناڤ یاریگەهێ دا دروست نابیت، بەلکو ژ ژوورێن کارگێڕی دەستپێدکەت.
