یانەیێن كوردستانێ ب دو سەركەڤتنا و دو خوسارەتیان گەڕا دویێ دەرباز كر
قەیس وەیس:
ب دووماهی هاتنا یاریێن گەڕا دویێ ژ دەستپێكا وەرزێ نوو یا خولا ستێرێن ئیراقێ یا فوتبۆلێ، ئەنجامێن یانەیێن كوردستانێ دناڤبەرا سەركەڤتن و خوسارەتییان دا بوو، ئەوا دهاتە هژمارتن یاریێن ئاگرین بۆ یانەیێن دهۆك و زاخۆ بەرانبەر یانەیێن جەماوەری یێن بەغدایی.
ئەلهۆیێن چیا ژ نێچرا خوە دوورە
بۆ یارییا دویێ ل دووڤ ئێك تیما یانەیا دهۆك نە شیا سەركەڤتنێ بینت پشتی بەرانبەر یانەیا شورتە یا بەغدایی ب دو گۆلان بێ بەرانبەر تووشی خوسارەتیێ بووی، د یارییا واندا ئەوا ل شەڤا دەربازبووی ل یاریگەها فەیحا ل باژێرێ بەسرا هاتیە كرن، دڤێ یاریێ دا دیاربوو ئەو ئاستێ چاڤەڕێ كر نیشان نەدا بوو ئەگەر دو گۆل د خولەكێن نەهێ و 40ێ ل سەر دهۆكێ بهێنە تۆماركرن، بڤی ئەنجامی دهۆك نەشیا قەرەبوویا گەڕا ئێكێ بكەت و بەردەوامی دا ئەنجامێن خوە یێن خراب.
ڕاهێنەرێ دهۆكێ ئەگەرێن خوسارەتیێ دیاركرن
د كۆنگرەیێ رۆژنامەڤانی دا سێرجیۆ ڤاریاس ڕاهێنەرێ تیما دهۆكێ گۆت: بۆ جارا ئێكێ یە یارییەكا بهێز بەرانبەر تیمەكا هەڤڕك و خودان شیان دكەین وەكو شورتە ئەوا پێكهاتییەكێ زیرەك و ب مۆرالەكا بلند، بەربژارێن ب هێزن بۆ ناسناڤی، بمخابنیڤە گۆلەكا د خولەكێن دەستپێكی هاتە تۆماركرن و بوو ئەگەر شورتە مفایی ژ هەڤسەنگییا ڕێزێن تیما مە بكەت و گۆلا دویێ بینت، هەرچەندە مە زاڤ كرن ڤەگەرین لێ بێ مفا بوو، دڤێ یاریێ دا دیاربوو مە خەلەتیێن هەین دڤێت بۆ یاریێن بهێت چارەسەربن، بڤی ئاستی ئەم د ڕازی نینن و دێ كارەكێ ڕژدی دگەل یاریزانان كەین بۆ ڤەگەڕاندنا سەركەڤتنان.
ژلایێ خوەڤە سلێمان زەكی شرۆڤەكارێ وەرزشی ل پارێزگەها دهۆكێ بۆ ئەڤرۆ گۆت: خوسارەتیەكا دل ئێشە بۆ جەماوەرێ دهۆكێ، ژبەركو مە ئاستێ تیمێ ب لاوازی دیت، هێشتا ڕاهێنەر ب دروستی نە گەهشتییە وێ پێكهاتیێ دروست دگەل هەبوونا خەلەتیێ، هونەری و تەكتیكی دناڤ یاریگەهێ دا، بۆ من یا سەیر بوو نە گازیكرنا هەر ئێك ژ پیتەر گۆرگیس، پاشەنگ عەبدوللا، د دەمەكی دا هارۆن ئەحمەد و دبیت ئەحمەد عەلی ژی د هنگاڤتی بوون، تیم پێدڤی ب ڤانایە، هەرچەندە هێشتا گەلەك یاری ماینە، ل وەرزێ بۆری ژی تیما دهۆكێ دو خوسارەتیێن دەستپێكی دابوون لێ دووڤدا هێدی هاتە پێش و سەركەڤتنێن باش ئینانن، ب هیڤی نە بۆ یاریێن بهێت ڕاهێنەر ب خەلەتیێن خوە زانیبیت و چارەسەربكەت.
هەولێر و زاخۆ سەركەڤتن
د یاریێن گەڕا دویێ دا هەر ئێك ژ یانەیێن زاخۆ و هەولێر سەركەڤتن ئینان و نەورۆز تووشی خوسارەتیێ بوو، یانەیا زاخۆ ل یاریگەها دهۆكێ ب 2-1 سەركەڤتن ل سەر جەوییە یا بەغدایی ئینا، هەولێر ل بەسرا سەركەڤتنەكا باش ل سەر مینا ئینا ب 3-1 گۆلان، ژلایێ خوەڤە نەورۆز دگەل نەفت میسان تووشی خوسارەتیێ بوو ب 2-1، ژ ئەنجامێن یاریێن دی یێن گەڕا دویێ، نەجەف چنە-1 دیالا، كەرخ2-1 ئەلقاسم، ئەلگەرمە 2-1 نەفت، ئەمانەت بەغدا چنە-3 مووسل، ئەلغرف 3-1 كارەبا، زەورا1-1 تەلەبە.
هەولێر سەرێ لیستێ یە
پشتی ب دووماهی هاتنا گەڕا دویێ هەلوەستێ یانەیێن كوردستانی بڤی شێوەی نە، یانەیا هەولێر ب شەش خالان سەرێ لیستێ دهێت، زاخۆ ب سێ خالان رێزا حەفتێ دهێت، نەورۆز ب هەمان خال كێمترییا گۆلان ل رێزا 13ێ دهێت، دهۆك ل ڕێزا 18ێ دهێت.
یاریێن گەڕا سێیێ
ل رۆژا پێنج شەمبییا بهێت دێ دەست ب گەڕا سێیێ هێتە كرن بڤی شێوەیی، یانەیا زاخۆ دێ بیتە مێڤانا یانەیا دیالا، د هەمان رۆژ دا یانەیا شورتە دێ مێڤاندارییا یانەیا نەورۆز كەت و نەفت دێ تەلەبە مێڤان كەت،ل ئەینییا بهێت، نەفت میسان- ئەلغرف، ئەلقاسم- ئەمانەت بەغدا، مووسل- نەجەف، ل شەمبییا بهێت 27ێ گۆلانێ یانەیا دهۆك دێ دناڤ ئەردێ خوە دا مێڤاندارییا كەرخ یا بەغدایی كەت، د هەمان رۆژ دا یانەیا هەولێر ل پایتەختێ ئیراقێ بەغدا بیتە مێڤانا كارەبا، دیسان جەوییە- مینا.
