یانەیێن كوردستانێ جهێ خوە د رێزبەندییا خولا ئیراقێ دا باشتر لێكرن
قەیس وەیس:
پشتی ب دووماهی هاتنا یاریێن گەڕا 16ێ ژ هەڤڕكیێن خولا ستێرێن ئیراقێ یا فوتبۆلێ هەرسێ یانەیێن دهۆك، زاخۆ و نەورۆز پێنگاڤێن باش بۆ پێشڤەچوونا رێزبەندییا خولێ هاڤێتنە ب سەركەفتنێن گرنگ و یانەیا هەولێر ب تنێ ئێك خال دەستڤە ئینایە.
دهۆك بەر ب تۆماركرنا ریكۆردەكێ نوو یا وەرزێ ئەڤ سالە
تیما یانەیا دهۆك ل سەر ئاست و ئەنجامێن خوە یێن باش بەردەوامە، پشتی شیایی د ناڤ ئەرد و جەماوەرێ خوە دا سەركەفتنەگا گرنگ ل سەر یانەیا كەربلا بینت ب دو گۆلان بەرانبەر گۆلەكێ، تیما ئەلهۆیێن چیا ب سەركێشییا ئەحمەد خەلەف دووماهی شەش یاریێن خوە دا پێنج سەركەفتن و ئێك خوسارەتی هەیە، هەروەسان گۆلپارێزێ دهۆكێ محەمەد سالح خودانێ 10 كلین شیت و ل رێزا دویێ ل سەر ئاستێ خولێ دهێت وەكو باشترین گۆلپارێز، د رێزبەندییا گشتی دا تیما دهۆكێ پێشڤە هاتییە رێزا سێیێ ب كۆمكرنا 27 خالان ژ هەشت سەركەفتن، سێ وەكهەڤی و پێنج خوسارەتییان، 14 گۆل هەنە و 11 گۆل ل سەر هاتینە كرن و دێ بزاڤێ كەت ریكۆردەكێ نوو یا سەركەفتنان تۆماربكەت، یارییا وێ یا گەڕا 17ێ دێ ل رۆژا ئەینییا بهێت ل باژێرێ بەسرا بیتە مێڤانا یانەیا مینا د یارییەكا گرنگ دا.
قوربانییا زاخۆ ب بەرهەم بوو
ژلایێ خوەڤە تیما یانەیا زاخۆ ژی بەردەوامە ب دەستڤە ئینانا سەركەفتن و خالان ژبۆ پێشڤەچوونێ، ب سەركێشییا راهێنەرێ خوە یێ قەتەری تەلال ئەلبلۆشی شیا سەركەفتنا خوە یا شەشێ د خولێ دا بینت و یا چارێ ل دووڤ ئێك پشتی دووماهی خوسارەتییا وێ دگەل یانەیا كارەباد گەڕا 12ێ دا، ئەڤچەندە وەكو نەریتەك هات پشتی یانەیا زاخۆ قۆربانیەكا ب سەرێ پەزەكی دایە خێر بۆ خاترا ڤەگەڕاندنا ئەنجامێن باش و شیا ب سەركەفتنا گەڕا 16ێ دگەل نەفت ئەلبەسرا بوو ل باژێرێ بەسرا و ب دو گۆلێن پاقژ سەركەفت بوو و شیا ژ رێزێن دووماهیێ بگەهیتە رێزا حەفتێ ب 25 خالان ژ شەش سەركەفتن، حەفت وەكهەڤی و سێ خوسارەتیان و 12 گۆل تۆماركرینە و هەشت ل سەر هاتینە تۆماركرن، یارییا بهێت یا زاخۆ دێ دناڤ ئەرد و جەماوەرێ خوە دا كەت ل شەمبییا بهێت بەرانبەر یانەیا زەورا د یارییەكا ب هێز دا.
نەورۆز هەڤڕكە و ئەنجامێن هەولێرێ دجیگێر نینن!
تیما یانەیا نەورۆز ژی شیایە جهێ خوە ل رێزبەندییەكا باش دا بكەت پشتی د یارییا بۆری دا ب چار گۆلێن پاقژ سەركەفتی ل سەر نەفت ئەلوەسەت ببیتە هەڤڕكا دهۆكێ د رێزبەندیێ دا كو هەتا نوكە ب 26 خالان رێزا چارێ دهێت، یارییا وێ یا بهێت دێ رۆژا پێنج شەمبی مێڤاندارییا شورتە كەت، ژلایەكێ دووڤە ئاست و ئەنجامێن هەولێرێ د جیگێر نینن لێ باشترن ژ دەستپێكا خولێ، پشتی دگەڕا 15ێ دا سەركەفتنەكا مەزن ل سەر كەربەلا ئینایی ب پێنج گۆلان بەرانبەر سێ گۆلان د گەڕا 16ێ دا دگەل نەجەف وەكهەڤی ئینا و پێشڤە هاتیە رێزا 11ێ ب 17 خالان ژ چار سەركەفتن و پێنج وەكهەڤییان، یارییا بهێت ل رۆژا پێنج شەمبی دێ مێڤاندارییا ئەمانەت بەغدا كەت.
دهۆك هاتە سزادان!
ل دووڤ بڕیارا لژنەیا سەپاندنێ و سزایان ل فیدارسیۆنا فوتبۆلا ئیراقێ دەرئەنجامێ راپۆرتا سەرپەرشتێ یاریا دهۆك و كەربلا یانەیا دهۆك ب كۆژمەیێ 10 ملیۆن دیناران هاتە سزادان و یارییا بهێت یا تیما دهۆكێ ئەوا دێ د ناڤ ئەردێ خوە دا كەت هاتە ڤەگۆهاستن بۆ یاریگەهەكا دی، ل دووڤ لیستەیا هاتیە بەلاڤكرن ئەوا بڕیاربوویی ل پێنجێ ئادارا بهێت ل یاریگەها خوە یانەیا كارەبا مێڤان كربا.
هەلوەستێ گشتی یێ رێزبەندیێ
1- جەوییە 40 خال.
2- شورتە 35 خال.
3- دهۆك 27 خال.
4- نەورۆز 26 خال.
5- تەلەبە 26 خال.
6- زەورا 26 خال.
7- زاخۆ 25 خال.
8- نەفت 23 خال.
9- نەفت میسان 22خال.
10- حدود 20 خال .
11- هەولێر 17 خال.
12- مینا17 خال.
13- نەفت ئەلبەسرا 17 خال.
14- نەجەف 17 خال.
15- كارەبا 16خال.
16- كەرخ 14خال.
17- كەربەلا 13 خال.
18- ئەمانەت بەغدا 12 خال.
19- ئەلقاسم 11 خال.
20- نەفت ئەلوەست 7 خال.
