یانەیێن كوردستانێ خوە ژ رێزبەندیا داكەفتنێ دوورئێخستن
قەیس وەیس:
ل ئەینیا بۆری یاریێن گەڕا 18ێ و بەری دووماهیا قۆناغا ئێكێ یا هەڤڕكیێن خولا پلا نایابا ئیراقێ یا تەپا پێی هاتنە كرن ئەوا ئەنجامێن یانەیێن كوردستانێ جودا بوون لێ ژ وانا شیان ب شێوەیێ بەروەخت خوە ژ رێزبەندیێن دووماهیێ و داكەفتنێ دووربێخن.
ل پێنچ شەمبیا بوری تیما یانەیا دهۆك ب خالەكێ ژ یاریگەها شەعب یا بەغدا ڤەگەڕیا پشتی ل گەل حدوود ب گۆلەكێ وەكهەڤبوویی، سەرباری دنیڤا ئێكێ دا دهۆك ب گۆلا یاریزانێ خوە محەمەد سەعید یا پێشكەفتی بوو لێ بەری بدووماهی هاتنا یاریێ ب پێنچ خولەكا حدوودێ شیا گۆلا وەكهەڤیێ بینت، ژلایێ خوەڤە یانەیا هەولێر ریمۆنتادا ل سەر یانەیا نەجەف ئینا و پێشكەفتنا خوە ب دو گۆلێن پاقژ بكەتە سێ گۆلان بەرانبەر دۆ گۆلان ئەوا ل یاریگەها نەجەف هاتیە كرن، ل ئەینیا بۆری یانەیا زاخۆ مفا ژ ئەرد و جەماوەرێ خوە وەرنەگرت پشتی ل گەل مێڤانا خوە یانەیا جەویە خودانا سەرێ لیستێ ب دو گۆلان بێ بەرانبەری خوسارەت بووی، نوونەرا چارێ یا كوردستانێ یانەیا نەوروز ب خالەكا گرنگ شیا وەكهەڤ بیت دگەل یانەیا تەلەبە یا بەغدایی.
بڤان ئەنجامان هندەك ژ یانەیێن كوردستانی شیان خوە ژ هێلا مەترسی و داكەفتن بۆ پلا ئێك دوورئێخستن و ژوانا جهێ خوە پارێزین ل رێزبەندین پێشیێ و بڤی رەنگی، هەولێر ب18 خالان پێشڤە هاتە رێزا16ێ، نەوروز 22 خالان رێزا12 و زاخۆ ب21 خالان رێزا 13ێ دهێت، ژلایێ خوەڤە تیما دهۆكێ جهێ خوە ل رێزا شەشێ پاراست ب31 خالان، ئەوا جەویە و شورتە ب38 خالان رێزێن ئێكێ و دویێ دهێن، كارەبا ب35 خال، تەلەبە34 خال و زەورا33 خال رێزێن سێیێ هەتا پێنجێ دهێن.
