یانەیێن مەزن د ناڤبەرا مەترسییا ژ دەستدانێ دا و مسۆگەركرنا قووناغا 16ێ
چاڤەڕێ دهێتە كرن ئەڤرۆ ل دەمژمێر 11ێ شەڤێ 18 یاری ژ چارچووڤەیێ گەڕا هەشتێ و دووماهیێ یا قووناغا خولێ ژ قارەمانییا یانەیێن ئۆرۆپا قارەمانێن خولا چامپیۆنز دەبازبوون بۆ قووناغا 16ێ بهێتە كرن كو دهێتە هژمارتن بۆ جارا ئێكێ یە بڤێ هژمارا یارییان دئێك شەڤ دا بهێتە ئەنجامدان.
بەنفیكا- ریال مەدرید
یانەیا ریال مەدرید یا ئسپانی دێ ل یاریگەها ئەننۆر بیتە مێڤانا یانەیا بەنفیكا یا پۆرتۆگالی كو دهێتە هژمارتن یارییەكا دی یا بهێز ژ چارچووڤەیێ چامپیۆنزێ، ریالێ 15 خال هەنە ل ڕێزا سێیێ دهێت و چاڤ ل سێ خالانە ژبۆ دەربازبوونا ئێكسەر بۆ قووناغا 16ێ، هەرچەندە وەكهەڤی ژی د بەرژوەندییا وێ دایە، یانەیا بەنفیكا شەش خال هەنە ل ڕێزا 29ێ دهێت، دەلیڤەیا دەربازبوونا ئێكسەر نینە لێ بۆ پاشكۆیێ دبیت هەبیت.
برۆسیا دۆرتمۆند- ئینتەر میلان
دناڤ ئەرد و جەماوەرێ خوە دا یانەیا بۆرۆسیا دۆرتمۆند یا ئەلمانی ل یاریگەها خوە سیگنال ئیدۆنا مێڤاندارییا یانەیا ئینتەر میلان یا ئیتالی كەت ئێك ژ یاریێن دی یێن هەڤڕكی، هەردو یانە دێ شەڕێ سێ خالان كەن ژبۆ دەستڤەئینانا پلێتا ئێكسەر بۆ قووناغا 16ێ، ئینتەرێ 12 خال كۆمكرینە ل ڕێزا 15ێ دهێت، بۆرۆسیا 11 خال هەنە ل ڕێزا 16ێ دهێت.
ناپۆلی- چێلسی
یانەیا ناپۆلی یا ئیتالی دێ چاڤەڕێ مێڤانا خوە یانەیا چێلسی یا ئنگلتەرایێ بیت د یارییەكا ئاگرین دا و چاڤێ هەردوكان ل سەركەڤتنێ یە، خودانێن بتنێ هەشت خال هەنە ل ڕێزا 25ێ دهێت، دوور دهێتە دیتن ئەو بۆ قووناغا شانزدێ دەربازبیت لێ دێ بزاڤێ كەت خوە بگەهینتە ڕێزبەندیا پێشكەڤیت دا دەلیڤەیەك بۆ پاشكۆی بەردەست بیت، لێ یانەیا چێلسی ئەوا ل ڕێزا هەشتێ دهێت ب كۆمكرنا 13 خالان كو دووماهی ڕێزبەندییا دبینە ئێكسەر یا دەربازبنە قووناغا 16ێ.
بەرشەلۆنا- كۆبنهاگن
ژلایەكێ دووڤە یانەیا بەرشەلۆنا یا ئسپانی دێ ل یاریگەها خوە یانەیا كۆبنهاگن یا دانیماركی مێڤان كەت، یانەیا كاتەلۆنی گەشبینە پلێتا ئێكسەر وەربگریت سەرباری ڕێزا نەهێ دهێت ب كۆمكرنا 13 خالان، دبەرانبەر دا یانەیا كۆبنهاگن یا دمەترسیا دەركەڤتنێ دا ئەوا هەشت خال هەین ڕێزا 26ێ دهێت.
مۆناكۆ- یۆڤانتۆس
یانەیا یۆڤانتۆس یا ئیتالی دێ بیتە مێڤانا یانەیا مۆناكۆ یا فرەنسی، هەرچەندە دەلیڤەیا دەربازبوونا مسۆگەر بۆ یانەیا ئیتالی بزەحمەتە ئەوا 12 خال هەین ل رێزا 15ێ دهێت، لێ تا ڕادەیەكێ مەزن مۆناكۆ ژ دەستدایە ئەوا نەهـ خال هەین ڕێزا 21ێ دهێت، هەردو یانە دێ بزاڤێ كەن بۆ پلێتا پاشكۆ.
ئەیاكس- ئۆلمپیاكۆس
ژلایێ خوەڤە ئەیاكس ئەمستردام یا هۆلەندی ل یاریگەها خوە یانەیا ئۆلمپیاكۆس یا یۆنانستانی مێڤان كەت، هەردو یانە چاڤ ل پلێتەكا پاشكۆ هەیە، یانەیا یۆنانستانی هەشت خال كۆمكرینە ل ڕێزا 24ێ دهێتن، یا هۆلەندی شەش خال هەنە ل ڕێزا 32ێ دهێت.
پاریس سانجێرمان- نیۆكاسل
ئێك ژ یاریێن د گۆپیتكا هەڤڕكیێن ڤێ گەڕێ دا یانەیا پاریس سانجێرمان یا فرەنسایێ دێ یانەیا نیۆكاسل یۆنایتد یا ئنگلتەرایێ مێڤان كەت، هەرچەندە ڕێژەیا دەربازبوونێ بۆ هەردو یانەیان باشترە، سانجێرمان خۆدانا 13 خالانە ل ڕێزا شەشێ دهێت، یانەیا ئنگلتەرایێ هەمان خال هەنە لێ ڕیژەیا گۆلێن پاریسێ زێدەترە.
ئەتلەتیكۆ بلباۆ- سپۆرتینگ لەشبۆنە
یانەیا ئەتلەتیكۆ بلباۆ یا ئسپانی دێ شەڕێ سێ خالان دگەل مێڤانا خوە سپۆرتینگ لەشبۆنە یا پۆرۆتۆگالی كەت، یانەیا پۆرۆتۆگالی هیڤیێن مەزن هەنە ئەوا 13 خال هەین و چاڤ ل سەركەڤتنێ یە بۆ پلێتەكا ئێكسەر، ئەتلەتیكۆ هەشت خال هەنە ل ڕێزا 23ێ دهێت و هەموو هیڤیێن وێ سێ خالن ژبۆ گەشكرنا هیڤیێن پلێتەكا پاشكۆ.
لیڤەرپۆل- كارباغ
دناڤ ئەرد و جەماوەرێ خوە دا یانەیا لیڤەرپۆل دێ یانەیا كارباغ یا كازاخستانی مێڤان كەت ب گەشبیینا سەركەڤتنێ و دەربازبوونێ، یانەیا ئنگلتەرایێ 15 خال كۆمكرینە ل ڕێزا چارێ دهێت، هەرچەندە یانەیا كازاخستانی وەكو سۆپرایزەكا چامپیۆنزییە شیایە 10 خالان كۆمبكەت ب گەهیتە ڕێزا 18ێ، لەوما ژی یانەیەكا ب سانەهی نابیت بۆ لیڤەرپۆلێ.
مانچستەر ستی- گالاتا سارایی
ئێك ژ یاریێن دی یێن گرنگن یانەیا مانچستەر ستی یا ئنگلتەرایێ دێ یانەیا گالاتا سارایی یا توركی مێڤان كەت، یانەیا توركی 10 خال هەنە ل ڕێزا 17ێ دهێت، مان ستی 13 خال كۆمكرینە ل ڕێزا 11ێ دهێت، هەردو یانەیان چاڤ ل سەركەڤتنێ هەیە ئێك ژبۆ دەربازبوونا مسۆگەر و یا توركی بۆ پاشكۆیێ دەربازبوونێ.
ئارسنال- كایرات ئالماتی
یانەیا ئارسنال یا ئنگلتەرایێ ئەوا دەربازبوونا خوە بۆ قووناغا 16ێ مسۆگەركری دێ ل یاریگەها خوە یانەیا كایرات ئالماتی یا كازاخستانی مێڤان كەت، یانەیا ئنگلتەرایێ خودانا ڕێزا ئێكێ ب21 خالانە و پێشكەنگە، دبەرانبەر دا یانەیا كازاخستانی ل دووماهییا لیستێ و 36ێ دهێت ب تنێ ئێك خال هەیە.
ئەتلەیكۆ مەدرید- بۆدۆ كلیمیت
یانەیا بۆدۆ كلیمیت یا نەرۆیجی دێ بیتە مێڤانا یانەیا ئەتلەتیكۆ مەدرید یا ئسپانی د یارییەكا دی دا كو دهێتە هژمارتن هەڤسەنگ نەبیت، ئەتلەیكۆ 13 خال هەنە ل ڕێزا 12ێ دهێت و هێشتا هیڤیێن دەربازبوونا مسۆگەر هەنە هەكە سەركەڤیت و گەلەك گۆلان بینت، یانەیا نەرۆیجی هیڤیێن پاشكۆیێ ژی نەبیت ئەوا شەش خال هەین ل ڕێزا 28ێ دهێت.
بایرن لیڤەركۆزن- ڤیاریال
ئێك ژ یاریێن دی یێن ئەڤ شەڤە بڕیارە بهێتە كرن دناڤبەرا خودانێن ئەردی یانەیا بایرن لیڤەركۆزن یا ئەلمانی و ڤیاریال یا ئسپانی، یانەیا ئەلمانی نەهـ خال هەنە و هیڤیێن دەربازبوونا مسۆگەر دبیت نەمابن ئەوا ل ڕێزا 20ێ دهێت لێ ب سەركەڤتنێ دێ دەربازبوونا خوە بۆ پاشكۆ مسۆگەر كەت، ژلایێ خوەڤە ڤیاریال دەركەتنا وێ مسۆگەر بوویە ئەوا ئێك خال هەیی ڕێزا 35ێ دهێت.
كلۆپ برۆچ- مارسیلیا
یانەیا كلۆپ برۆچ یا نەرۆیجی دێ ل یاریگەها یانەیا مارسیلیا یا فرەنسی مێڤان كەت، دبیت ئەڤ یارییە بۆ پلێتا پاشكۆ بیت ئەو تیما ب سەركەڤیت دێ هیڤیێن دەربازبوونێ هەبن، مارسیلیا خودانا نەهـ خالانە ل ڕێزا 19ێ دهێت، كلۆپ برۆچێ حەفت خال كۆمكرینە ل ڕێزا 27ێ دهێت.
ئایندهۆڤن- بایرن میۆنخ
یانەیا بایرن میۆنخ یا ئەلمانی دێ بیتە مێڤانا یانەیا ئایندهۆڤن یا هۆلەندی دیارییەكا ئێكلاكەر دا بۆ ئەلمانییا ئەوا دێ بزاڤێ كەت دەربازبوونا خوە ژی ئێكلا بكەت، بایرن خودانا 18 خالان ڕێزا دویێ دهێت، ئایندهۆڤن هەشت خال هەنە ل ڕێزا 22ێ یە وچاڤ ل پلێتەكا پاشكۆیە.
ئاینتراخت- تۆتنهام
بڕیارە یانەیا ئاینتراخت فرانكفۆرت یا ئەلمانی یانەیا تۆتنهام یا ئنگلتەرایێ مێڤان بكەت، هەرچەندە یانەیا ئەلمانی هیڤیێن دەربازبوونێ و پاشكۆ ژ دەستداینە ئەوا چار خال هەین ل ڕێزا 33ێ دهێت لێ یانەیا ئنگلتەرایێ ئەوا 14 خال هەین ڕێزا پێنجێ دهێت هیڤیێن مەزن هەنە بۆ دەربازبوونا مسۆگەر.
یۆنیۆ سانت جیلواز- ئەتلانتا
یانەیا بەلجیكی یۆنیۆ سانت جیلواز دێ ل یاریگەها خوە یانەیا ئەتلانتا یا ئیتالی مێڤانكەت، یۆنیۆ خودانا شەش خالانە ل ڕێزا 31ێ دهێت و ئەتلانتا 13 خال كۆمكرینە ل ڕێزا 13ێ دهێت.
باڤۆس- سلاڤیا
یانەیا باڤۆس یا فوبرسی دێ ل یاریگەها خوە یانەیا سلاڤیا براگ یا چیكی مێڤان كەت، هەردو یانەیان هیڤیێن دەربازبوونێ یێن مسۆگەر و پاشكۆ نینن، باڤۆس شەش خال هەنە ل30ێ ڕاوەستیایە و سلاڤیا سێ خال هەنە لڕێزا 34ێ دهێت
سیستەمێ قارەمانیێ
هەژی گۆتنێ هەر یانەیەك دێ هەشت یارییان دگەل یانەیێن جودا كەت، چار یاری دناڤ ئەردێ خوە دا و چار ژ دەرڤەیی یاریگەها خوە، هەشت یانەیێن ئێكێ دێ دەربازبنە قۆناغا 16ێ، ئەو یانەیێن ژ ڕێزا نەهێ هەتا 24ێ دهێن دێ هەڤڕكیێ بۆ هەشت پلێتێن مایی یێن دەربازبوونێ بۆ قۆناغا 16ێ كەن، ئەو یانەیێن د رێزا 25ێ هەتا 36ێ دهێن دێ ژ هەڤڕكییان هێنە دوورئێخستن.
