یانەیێن مە و گرێبەستێن یاریزانان
ئیحسان حەسەن
وەكو یا دیار لڤان رۆژان گەلەك بەحسێ گرێبەستێن یانەیان دگەل پیشەكارێن بیانی، بەری خرڤەكرن و دەستپێكرنا كەمپێن راهێنانێ یێن خوە بەرهەڤكرنێ بۆ وەرزێ نوو یێ خولا ستێرێن ئیراقێ یا فوتبۆلێ دهێنەكرن، بێ نەڤێت كارگێریا هەر تیمەكێ یا ب هیڤییە باشترین گرێبەستان گرێدەت بۆ هندێ مفای ژ شیانێن وان پیشەكاران بینیت، كو ببنە باشترین نوونەر بۆ یانەیێن وان ژبۆ پشكداریەكا سەرفەارزتر ژ وەرزێ بوری وبجهئینانا هیڤی و ئارمانجێن خوە و پشتەڤان و حەژێكەرێن خوە، بۆ بجهئینانا ڤێ چەندێ ژی ئەز باوەرم راهێنەرێ هەر تیمەكێ باشتر دزانیت كا پێدڤیێن تیما ئەو سەرپەرشتییێ لسەر دكەت چنە، وی چ جورێ یاریزانان دڤێن، ل كیژ هێلێ كێماسی هەنە، داكو بشێن تەكتیكێن خوە لسەر ئاڤا بكەت، بەلێ دبیت هەموو تشتەك وەكو راهێنەری دڤێت چێ نەبیت، ب تایبەت ئەگەر كارگێریا یانەیێ رازی نەبوو لسەر ناڤێ وان یاریزانان، ژبەر بلندبوونا بهایێ گرێبەستێن وان، ژبلی هندێ گرێدانا گرێبەستێ دگەل پێگوهۆرن وان دبیت هەمان ساخلەت لدەف نەبن یێن كو راهێنەرێ تیمێ دڤێن، ئەڤ چەندە ژی ئاریشەیان پەیدابكەت دناڤبەرا كارگێرێن یانەیان و جەماوەری وان، ب تایبەت ئەگەر دەنگ و باسێ ڤەگوهاستنا ڤان یاریزانان چ راست یان نە ل سوشیال و میدیایا وەرزشی هاتبنە بەلاڤكرن، ژبەر هندێ لڤێرە هێزا پارەی رۆلەكێ سەرەكی دبینیت ژبۆ دانانا هزرا كارگێری و دەستنیشانكرن و دیاركرنا ئارمانجێن پێش وەخت، چونكو پتر چاڤ دێ ل وەرزێ بهێت كەڤنە لسەر خولا ستێرێن ئیراقێ، دگەل وێ هەڤركییا نها دناڤبەرا یانەیان دا دهێتە كرن لسەر بدەستڤەئینانا باشترین یاریزانان، ئەز هووسا دبینم پێدڤییە هاریكاریێن دارایی یین یانەیێن مە یێن كوردستانێ ئەوێن دهێنە دان ژلایێ حكومەتا كوردستانێ ڤە ژ وەرزێ بوری باشتر لێ بهێن، ژبەر كو بهایێ یاریزانان بلندتر لێ هاتینە، خەرجیاتێن وان ژی دێ پتر لێ هێن، ئەز هووسا دبینم كو هەر گرێبەستەك یان هەلبژارتنەك دڤێت لدووڤ نێرینەكا راست و دورست بوریت، بووچوونا من یانەیا دهۆك هێلەكا بەرگێریێ یا بهێزتر پشتی چوونا گۆلپارێز و هەردو بەرازیلیان دڤێت، دگەل دو یاریزانێن سۆپەر بۆ هێلا هێرشبەریێ، زاخۆ ژی چونكو پشكداریا كەنداڤی ل پێشیا وانە، نە تنێ یاریزانێن تەكتیكی دڤێن، بەلكو یێن تەكنیكی ژی، دڤێت گوهۆرینەكێ دشێوازێ یاریا خوەدا برێكا راهێنەرێ خوە بكەت، وان ژی یاریزانەكێ راگر و دو تەكێن باشتر و هێرشبەركێ سۆپەر دڤێت، دیارە هەولێری هێشتا بادەكا وان یا گرێبەستان دگەل پیشەكاران یا گرتیە، ژبەر ئاریشەیێن وان یێن كارگێری و نەبوونا دەستەكا برێڤەبرنا یانەیێ، هەرچەندە باشترینێ تیما وان ب گری یانە بجه هێلا و بەر ب كەلها سۆرڤە هات، پیشەكارێن یانەیا نەورۆز ل وەرزێ بوری ل ئاستێ هیخوازیێ جەماوەرێ خوە نەبوون، پێدڤی ب نووكرنێ، ئەگەر بڤێن هەڤركییێ بكەن، یا من دڤێت بێژم هەر كارگێریەك یان راهێنەرەكێ تیمێ پتری هەموویان دزانیت كا پێدڤیێن تەكنیكی یێن تیما وان چنە، لێ ئەڤە رامانا هندێ نادەت كو رەخنەگر و چاڤدێرێن وەرزشی بوچوونێن خوە یێن تایبەت نەبن.
