یانەیێن پارێزگەهێ كۆنترۆلا ڕێزێن پێشیێ یێن قارەمانییا تیكۆنجتسۆیا ئیراقێ كرن
ب پشكدارییا زێدەتری 200 یاریزانێن كچ و كوڕ ژ 19 یانەیێن ئیراقێ و هەڤڕكیێن قارەمانییا كۆپا ئیراقێ بۆ یارییا تیكۆنجتسۆ والسكی یێن پێشكەڤتی، لاوان و تازەپێگەهشتیان ب دووماهی هاتن ئەوا بوو ماوەیێ چار رۆژان ل بنگەهێ وەرزش و لاوێن دهۆكێ دهاتنە كرن، كۆمەكا كوڕ و كچێن یانەیێن ئافرەتێن دهۆك، گارە، دهۆك، رێزێن ئێكێ ب دەستڤەئینان ئەوا یانەیێن سەنحاریب، سێمێل، تیما بنگەهێ وەرزش و لاوان وەكو مێڤاندار، پۆلیتەكنیك و تەناهی پشكداربوون.
ئەنجامێن گشتی بڤی شێوەیی بوون.
ل سەر ئاستێ تازەپێگەهشتیان كچان، 1-گارە، 2- سێمێل، 3- تەناهی.
ل سەر ئاستێ لاوان كچان، 1- دهۆك، 2- پیرس، 3- تلسقۆف.
ل سەر ئاستێ پێشكەڤتیان كچان، 1- ئافرەتێن دهۆك، 2- دهۆك، 3- گارە.
ل سەر ئاستێ كوڕان پێشكەفتیان ، 1- ئەلموستەقبل، 2- تلسقۆف، 3- دهۆك.
ل سەر ئاستێ كوڕان ناشئین، 1- ئەلموستەقبەل، 2- دهۆك، 3- ئەلمەشرق.
شەش یاریزانێن تیما ئافرەتێن دهۆكێ ل سەر ئاستێ لاوان ڕێزێن ئێكێ ب دەستڤەئینان بڤی شێوەیی، ئایا سالم بۆ كێشا -50كگم، نورئەلهودی حسێن بۆ كێشا -54كگم، سیدرا ئازاد -58 كگم، ئالین بەیار -62 كگم، نۆژین سەربەست -67 كگم، سیپەل شەوكەت +72كگم.
د داخویانیەكێ دا مەحموود ئیبراهیم سەرۆكێ فدراسیۆنا ئیراقێ بۆ یارییا تیكۆنجتسۆ و ئالسكی بۆ رۆژنامەیا ئەڤرۆ دیار كر، پێخوەشحالین ب باشترین شێوە قارەمانی بڕێڤەدچوو ب ڕێكخستنەكا جوان و هەڤڕكییەكا ئێكجار باش هەبوون ل سەر ڕێزێن پێشیێ، بۆ مە گرنگ ئەم ئەڤێ یاریێ زێدەتر بەلاڤبكەین و بنیاتێ وێ بەرفرەهتربكەین، پشكدارییا 230 یاریزانان ژ 19 یانەیان كو پرانییا وێ ژ هەرێما كوردستانێ یە، ڕامانا وێ پشتەڤانی و پێشكەڤتنا ڤێ یاریێ یە، ئەم سۆپاسییا هەكار محەمەدئەمین سەرۆكێ فدراسیۆنا پارێزگەها دهۆكێ و د. ئەحمەدقاسم سەرۆكێ لژنەیا ئۆلمپی ل پارێزگەها دهۆكێ و هەر لایەنەكێ پشتەڤانییا مە كر،
هەروەسان ناڤهاتی گۆت: پشتی ب دووماهی هاتنا قارەمانیێ دێ كادرێ ڕاهێنانێ یێن هەرسێ ئاستان ڤاڤارتنا ئەوان یاریزانێن ڕێزێن ئێكێ و دویێ بدەستڤەئیناین كەن پێخەمەت دروستكرنا هەلبژارتیێن ئیراقێ بۆ ئاست و كێشێن جودا و دانانا ژڤان و پلانان بۆ خوە بەرهەڤكرنا هەلبژارتیێن ئیراقێ بۆ قارەمانییا عەرەبی ئەوا بڕیارە هەڤڕكیێن وێ ل چرییا دویێ یا بهێت ل مسرێ یان مەغرب بهێتە كرن، هەروەسان خوە بەرهەڤكرنە بۆ كۆپا ئاسیا ئەوا چاڤەڕێ ییە هەڤڕكیێن وێ ل چریا دویێ یا بهێت پایتەختێ ئیراقێ بەغدا مێڤاندارییا وێ بكەت.
ژلایێ خوەڤە شیمال محەمەد سەرپەرشتێ یاریزانێن یانەیا ئافرەتێن دهۆكێ و ڕێڤەبەرێ یاریزانێن پارێزگەهێ گۆت: یاریزانێن پارێزگەها دهۆكێ ب هەموو یانەیێن خوە ڤە شیان باشترین شێوە هەڤڕكیێ بكەن و ڕێزێن پێشیێ ب دەستڤە بینن، ئەڤە ژی بەلگەیە كو ئەو پلانا مە دانایی بشێوەیەكێ باش بڕێڤەدچیت و یا سەركەڤتییە، دەستخووشیێ ل هەموو ڕاهێنەرێن خوە دكەین و ئەو یانەیێن بووینە پشتەڤان دگەل مە.
ژلایەكێ دووڤە ناڤهاتی گۆت: یارییا تیكۆنجتسۆ والسكی دبیت بۆ هندەكا یا نوو بیت، ئەوا ل 2007ێ ل سەر ئاستێ ئیراقێ و كوردستانێ هاتییە دامەزراندن، لێ یارییەكا بهێزە و خوەشیەكا تایبەت یا هەیی كو ئێك ژ یاریێن جەنگی نە، بەربەلاڤبوونا وێ ل پارێزگەهێ ب شێوەیەكێ باش بوویە و ئەڤە ژی پشتەڤانی و هەڤكارییا مە دهێتە كرن ژلایێ فدراسیۆنا ئیراقێ یا ڤێ یاریێ، فدراسیۆنا هەمان یاری ل دهۆكێ، لژنەیا ئۆلمپی تایێ دهۆك و یانەیێن مە یێن وەرزشی، گەشبینم بڤی شێوەیی دێ ئەڤ یارییە باشتر پێشكەڤیت و مە یاریزانێن هەین ل سەر ئاستێ ئیراقێ و دەرڤە ئێكەمن و ئەڤەژی بەلگەیە ل سەر پلانێن مە.
