یا ئێَكێ ل سه‌ر ئاستێ كوردستانێ ژ گونده‌كێ سحێلایه
ئه‌ڤرۆ، سالار محه‌مه‌د دۆسكی:
پشتی ئه‌نجامێن پولا نه‌هێ نشتیمانی هاتینه راگه‌هاندن، سه‌ركه‌فتیا ئێكێ ل سه‌ر ئاستێ كوردستانێ قوتابیا قوتابخانا گونده‌كی یه ل نێزیك سحێلا سه‌ر ب په‌روه‌ردا سێمێلێ یه و هه‌ر هه‌موو نمرێن ب بابه‌تان 100 ، به‌رپه‌رێ په‌روه‌رده و زانكۆ ل رۆژناما ئه‌ڤرۆ زانیاریێن زێده‌تر ل سه‌ر به‌لاڤه دكه‌ت.
حه‌سه‌ن چه‌له‌بی، رێڤه‌به‌رێ په‌روه‌ردا قه‌زا سێمێلێ بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: قوتابی هیدار نزار سالح، قوتابیا قوتابخانا چه‌مێ ئاراس ل گوندێ گوزگیان كو دكه‌ڤیته ده‌ڤه‌را زمار نێزیك سحێلا، سه‌ر ب په‌روه‌ردا سێمێلێ ڤه شیا تێكرا نمران 100% وه‌ربگریت ل سه‌ر ئاستێ قوناغا نه‌هێ نشتیمانی ل سه‌ر ئاستێ كوردستانێ یا ئێكێ ده‌ربكه‌ڤیت.
رێڤه‌به‌رێ په‌روه‌ردا سێمێلێ ئه‌و ژی گۆت: قوتابخانا ڤێ قوتابیێ ل گونده‌كی یه و یا ئاسایی یه و مامۆستایێن وێ هه‌ر وه‌ك مامۆستایێن قوتابخانێن دی نه و ئاسته‌كێ باش هه‌یه، لێ ده‌رچوونا ڤێ قوتابیێ بڤی ره‌نگی ڤه‌دگه‌ریت بۆ هێز و شیانێن ڤێ قوتابیێ بخوه، بخوشحالی ڤه ل سالا بوری ژی دووه‌ما كوردستانێ ل به‌شێ زانستی ل پولا 12ێ هه‌ر ل سنورێ په‌روه‌ردا قه‌زا سێمێلێ بوو.
چه‌له‌بی ئه‌و ژی ئاشكراكر كو ل ئه‌ڤ ساله ل سنورێ په‌روه‌ردا سیمێلێ زێده‌تر ژ 4000 هزار قوتابیان پشكدری ئه‌زموونێ، پولا نه‌هێ نشتیمانی بووینه، 2600 قوتابی ده‌رچووینه و ئه‌ڤێن ماین چووینه خولا دووێ.
ل دور رازیبوونا وان ژی ژ ئاستێ قوتابیان، رێڤه‌به‌رێ په‌روه‌ردا سێمێلێ گۆت: هه‌تا ئاسته‌كێ باش پولا نشتیمانی ژێ درازینه ل دووف كاودانێن نوكه ده‌ربازدبن و دیسا پولا نه‌هێ نشتیمانی 40 نمره گرێدایی قوتابخانێ بووینه و 60% ژ ئه‌زموونێن نشتیمانی پێ دهێت و یا هه‌ڤپشكه دناڤبه‌را قوتابخانێ و ئه‌زموونێن مه‌كه‌زی دا .
رۆژناما ئه‌ڤرۆ گه‌له‌ك بزاڤكرن خوه بگه‌هینته سه‌ركه‌فتیا ئێكێ ل سه‌رئاستێ كوردستانێ كو بۆ به‌رپه‌رێ په‌روه‌رده و زانكۆ باخڤیت، لێ هاتینه ئاگه‌هداركرن كو ئه‌و قوتابی ماوێ پێنچ رۆژه تووشی كورونایێ بوویه و ساخله‌می یا وێ تێكچوویه، له‌وما بابێ وێ كو پێشتر مامۆستایێ كولیژا ئه‌ندازیاری بوو نوكه خانه‌نشینه، وه‌ك دیاركری كو ئه‌و ژی ده‌رچوویێ ئێكێ بوو ل سه‌ر زانكۆیا مویسل ل سه‌ر ده‌مێ خوه، ل دور كچا خوه بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: هیدار هه‌ر سال ل قوتابخانێ ده‌رچوویا ئێكێ یه، ده‌مژمێرێن خواندنا وێ دسرۆشتی بووینه لێ بتنێ شیانێن وه‌رگرتنێ و خواندنێ ره‌نگه زێده‌تر بووینه ژ كه‌سه‌كێ دی و دیسا وه‌ك خێزانا وێ ژی گه‌له‌ك پشته‌ڤانیا وێ دكه‌ین بخوه بخوینت و یا سه‌ركه‌فتی بیت، مه پێشبینی یا سه‌ركه‌فتنا وێ دكر چنكو ئاستێ وێ گه‌له‌كێ به‌رز بوویه، رۆژانه نێزیكی چار ده‌مژمێران دخواندن و مه چ مامۆستایێن تایبه‌ت بۆ نه‌گرت بوون و دیسا هیدارێ موبایل ژی هه‌یه.
بابێ هیدارێ گۆتژی: من چار زارۆك هه‌نه دو كچ و دو كور، خویشكا وێ ژی ل هه‌مان قوناغا نه‌هێ نشتیمانی یه و پلێن وی ژی هه‌موو 100 بتنێ بابه‌ته‌كی 98 ئینایه، كوره‌كێ من پولا هه‌شتێ یه و پێشبینی دكه‌م نمرێن وی ژی هه‌موو 100 بن، لێ برایێ ویێ دی نه‌وه‌ك وانه ئاستێ وی كێمتره.
بابێ هیدارێ گۆتژی: دایك و بابا كارتێكرن ل سه‌ر زارۆكێن خوه هه‌یه لێ هه‌موو بۆ قوتابی ڤه‌دگه‌ریت كا هزر و شیانێن وه‌رگرتنێ چه‌ند و دێ شێت چه‌ند بابه‌تی وه‌رگریت و چه‌ند حه‌ز ل سه‌ر قوتابخانێ و پاشه‌رۆژا خوه هه‌بیت، شیره‌تا من بۆ هه‌موو دایك و بابا ئه‌وه ده‌مه‌كی بۆ بكائینانا موبایل و ئایاپاتا ده‌ست نیشان بكه‌ن و نه هه‌ر ده‌مێ ڤیا ده‌ستی دابیت و دیسا ژینگه‌ه بۆ زارۆكان ل مالا بهێتـه خوشكرن.
