یا ستار ژ ئاگری…
عارف حيتو
بۆ ئادگار ئالان پۆ..
گوله‌كێ خوه دا ره‌خه‌كی و ژ باخچه‌ی ده‌ركه‌ت
دا ته‌ڤ كول و ده‌ردێن ئاخێ بۆ چێكرین
ژ دلی ده‌ركه‌ت
رازێن ئاخێ، د ده‌قه‌كێ كابانێ دا خوه متكر و
ئاگر یێ به‌ر دبیت ئاقاری
ئوو یا دووره گه‌هشتنا سه‌ر رووباری
ئاگر بۆش بوو، باخچه ڤه‌گرت
هه‌می گول تێكدا بوون ره‌ژی
شینیێ خر به‌ر و بیاڤ ڤه‌گرتن و ببوو په‌ژی
هه‌ستا ئۆلداره‌كێ سۆفی ب به‌ركه‌ت
دلبۆرینێ هه‌ست و مه‌ژێ وی جه‌مداند
كه‌فه‌كا سپی، مینا كه‌فا سابوونێ بوو
ژ ده‌ڤی ب سه‌ركه‌ت
پیرێ مۆگان لۆته‌ك ل خوه دا و
ل به‌ر ده‌رگه‌هێ په‌رسگه‌هێ، گوڕی دمێشت
هه‌موو گیانێن مه‌نده‌هۆش، مه‌ست و سه‌رخۆش
ل قورنه‌تان لاڤه دكرن
باوه‌ریه‌كا گیرۆكری ب ده‌رگه‌هی ڤه دل دز بوو
دلێ دلین ب دیتنا خه‌ونێ ڤه جه‌نگز بوو
ئه‌ز بێ دلم كو خه‌ون ژێ هاته دزین
مشتی كولم، كو مشه‌خۆر ب سه‌ربه‌ستی
ل سه‌ر رێكا نه‌رم ڤه‌ژین!
هه‌می ده‌ست و تلێن نه‌رم ب دیتنێ ڤه ره‌نگز بوو
ڤێ نه‌رمیێ- ئه‌و نه‌رمیا ژ ره‌قیێ بووی
باران باراند.. كره له‌هی
سه‌مایه‌كا گه‌رم شاراند، كره به‌هی
ما دێ هه‌تا كه‌نگی ل به‌ندا ته مینم و تو دێو
هه‌تا كه‌نگی دێ تۆڤێ دیتنێ چینم و
تو دێ تاریێ د رێكا من دا كه‌یه كێو
ل به‌ر به‌ته‌نا تێكهه‌لكرین ئه‌رێ و نه‌هی
دێمێ وی وه‌ك سوولاڤه‌كا رۆناهیێ
كه‌فتیه سه‌ر چاله‌كا كوور
ده‌نگێ وی وه‌ك زه‌نگلا خۆشی و ئاشتیێ
د په‌شی ژ دوور
ب سه‌رسۆرمانه‌ك هه‌لچوویی دگۆ:
ئاگری.. ئاگری، ده‌همه‌نه‌كا ب نڤێژ سۆت
كۆما ئۆلداران ڤه‌دگێرا: یا ستار ژ ئاگری..!
ئاگری.. ئاگری، سڕ ژ قورمێن داران ڤه‌ڕۆت
كۆما ئۆلداران ڤه‌دگێرا: یا ستار ژ ئاگری..!
شنه‌بایه‌كێ هوون نامه‌یه‌ك دا ده‌ستێ پیری و
ده‌ستێ توند.. به‌ستی بوو ب كاڤلانێ شیری
مریدان ده‌ست دا مه‌شخه‌لان
دا ده‌هۆلا شه‌ڕی لێ بده‌ن
ده‌ستكێ ده‌هۆلێ ل ور نه‌بوو و
پیرێ مۆگان.. د ناڤ مژێ دا به‌رزه بوو
ئه‌ڤ ره‌وشا نوو سه‌رهه‌لدایی و به‌رزه بووی زوو
نه‌سه‌ربۆرا په‌هله‌وانه‌كێ شكه‌ستیه
یان ژ مه‌یدانێ ره‌ڤیه
نه ژێكبژیانا خه‌مانه یان ژی وه‌ریانا به‌لگانه
ئه‌ڤه خه‌ونه- خه‌ونه‌كا ئادگار ئالان پۆ
دادا سه‌ر جانێ راستیێ و ژنشكێڤه چۆ!
*
