یا فەرە خەلك كەڤالێن خۆمالی بكڕن
سندس سالح سلێڤانەیی:
شێوەكار (شێرزاد شاهین حەسەن) كو ب (شێرزاد مارونسی) دهێتە نیاسین، د دیدارەكێ دا بۆ رۆژنامەیا ئەڤرۆ گۆت: دەمێ ئەز قوتابی ل قوناغا سەرەتایی حەزا چێكرنا وێنەیان ل دەف من هەبوو، خێزان و ماموستا و هەڤالێن من ژی پشتەڤانیا من دكرن، لەورا من بەردەوامی دایێ و پشتی من ئامادەیی ب دووماهی ئینای ئەز چوومە كولیژا زانستێن مرۆڤایەتی/پشكا شێوەكاری ل زانكۆیا دهۆك و پشتی دەرچوونێ ژی دێ یێ بەردەوامبم و ب شێوەیەكێ ئەكادیمی دێ خزمەتا هونەرێ كوردی كەم.
هەروەسا گۆت: ل كولیژێ مە گەلەك ماموستایێن باش هەنە، ژوانا( د. سەعدی و سیروان شاكر) كو مەمفایەكێ باش ژوان دیت و ئەم فێری ئەتەكێتێن هونەری بووین، بۆ زانین من پشكداری دگەلەك پێشانگەهێن هەڤپشكدا كریە، هەروەسا دووماهی پشكداری من و هەڤژینا خوە پێكڤە بەری چەند رۆژان پێشانگەهەك ل پاركا نەورۆز ل فەستیڤالا هاڤینی ڤەكریە و هەتا دووماهیا ڤێ حەفتیێ دێ یا بەردەوام بیت، داخوازا مە ژ خەلكی ئەوە كەڤالێن شێوەكارێن كورد بكڕن و خوە ژ یێن بیانی دووربكەن، هەرچەندە فرۆتنا كەڤالان هەتا رادەیەكی یا كێمە، بەس هەكە كەڤالەك یێ باش بیت و شێوەكاری داهێنان تێدا كربیت دێ هێتە فرۆتن، لێ دخوازین حكومەتا هەرێما كوردستانێ پتر پشتەڤانیا شێوەكاران بكەن دا بشێن پێشانگەهان ڤەكەن و ئەز ئێك ژوان كەسامە هەكە پشتەڤانی هەبیت دێ پێشانگەهەكا تایبەت ڤەكەم و فەرە ژی خەلك كەڤالێن خۆمالی بكڕن و ل مالێن خوە ب هەلاویسن.
