یا من بهیستی من دیت
گرین نازی عبدولباقی
من دبهیست..!
ژیان یا بوویە هڕوبایەکێ سۆر
چپکێن بارانێ دڕەشن، ڕێ دکەڤن
ژ ڕێیێن نێزیک ..
بۆ خوناڤا ڕێیێن دوور
چیا دەست ددەنە سینگێ خوە،
خوە دچەمینن ..
ژ بۆ ناخێ دەریایێن کوور
ژ ڤێ دیتنێ!
کیژان ژێهلە کیژان ژۆر..!؟
من ددیت:
ل شوونا قێرینێ
دایك دکەنن و
تژی د چاڤێن وان دا
ڕۆندک و حەسرەت و نالن
برینێن بابێ کوور و بێی خوینن
هندی دەست ددەنە ڤێ برینێ
ل شوونا خوینێ خوێ ژێ دپەشیت!
زۆردارەک..
خوەدی ڕوویێن ڕەش و چاڤێن شۆڕ
ب خەونێن وی دکەنیت..!
ئاوازەکێ بۆ دژەنیت
ب وێ ئاوازێ
زاڕۆ بێی گری ژ دایک دبن
ل شوونا دەزبلینکێ..!
ل شوون دەستان
قەید و زنجیر و دارن..
ل هەمی قولاچان هندەک مەخلووقن
سەرێن سەیا و کوری مارن
ژ زاڕۆیێ هێشنەبوویی
هەتا کالێ ڕۆحسەرداچوویی
خوەدی پشتییەکە
ژ ئاخ و نان و کەرامەتێ
مرۆڤاتییێ دکەنە گۆپال و
پێ ب ڕێ دکەڤن..
هێش ئەڤە هندەک داخن
د دلێ وان دا مایی
جار دبنە ڕۆندک..
جار دبنە خەمەک ڤەمایی
جار ژی دبنە پەلێن تژی ئاگر
مینا دلۆپێن مرنێ
دبنە (ئاهەک) و دکەڤت ناخێ وان
هەردەمێ دەست دایێ
دبیتە بارەک گران و
ل سەر سەرێ وان
چپک چپک دهێتە خوار
