یا پێدڤی بۆ پێشڤەبرنا قـووناغـا ئاشتیێ ل تورکـیا دهێتە کـرن
شیرەتکارێ سەرۆک کۆمارێ تورکیا دیار دکەت، کۆمسیۆنا ئاشتیێ د سێ قووناغان دا کارێ خوە دکەت، دڤێت هەر سێ قووناغ ژی ب باشی بهێنە تەمام کرن، نابیت لەز د کارێ کۆمسیۆنێ دا بهێتە کرن و سەرۆک کۆمارێ تورکیا ژی پشتەڤانیەکا باش ددەتە کۆمسیۆنا ئاشتیێ.
محەمەد ئووچوم شیرەتکارێ سەرۆک کۆمارێ تورکیا سەبارەت ب کارێ کۆمسیۆنا ئاشتیێ ل تورکیا دیار کر، وان بەری نها بریار دابوون کو کارێ کۆمسیۆنێ دوور ژ چاڤێ راگەهاندنێ بهێتە کرن، چونکی گەلەک بابەتێن هەستیار هەنە کو دڤێت د کۆمسیۆنا ئاشتیێ دا بەحسێ وان بهێتە کرن، نابیت هەموو تشت د دەزگەهێن راگەهاندنێ دا بەحسێ وان بهێتە کرن، ژ بەر ڤێ یەکێ ژی هەتا نها د راگەهاندنا تورکیا دا بەحسێ ناڤەرۆکا کۆمبوونێن کۆمسیۆنێ نەهاتیە کرن و ئەو یەک ژی گەلەک یا باشە.
ناڤهاتی ئەو یەک ژی دیار کر، کۆمسیۆنا ئاشتیێ دێ د سێ قووناغان دا کارێ خوە ئەنجام دەت، یا ئێکێ کۆمسیۆن دێ گوهداریا گەلەک کەسان و سازیان کەت، کەسێن کو پەیوەندیا وان ب روودانێن سالێن بۆری هەیی و ئەو یەک ژی دێ بیتە هاریکار دا ئەندامێن کۆمسیۆنێ راستیێن هەی باشتر ببینن و ل گۆر هندێ ژی راپۆرتێن خوە ئامادە بکەن، قووناغا دویێ ژی کۆمسیۆن دێ پێشنیازێن گەلەک کەسان و سازیان وەرگریت، بێگومان ئەو یەک ژی گەلەک گرنگە و قووناغا دووماهیێ ژی بێگومان دێ قووناغا بەرهەڤکرنا راپۆرتان بیت بۆ چاکسازیێن قانوونی و سیاسی ل تورکیا.
شیرەتکارێ سەرۆک کۆمارێ تورکیا ئەو یەک ژی دیار کر، هەتا نها چو ئاستەنگی ل هەمبەر کارێ کۆمسیۆنێ دروست نەبووینە و کۆمسیۆن وەکو پێدڤی کارێ خوە ئەنجام ددەت، هندەک هێز و ئالی دخوازن هەر زوو قووناغا ئاشتیێ بگەهیتە هندەک ئەنجامان، نابیت لەز د کارێ کۆمسیۆنێ دا بهێتە کرن، چارەسەرکرنا پرسەکا وەسا مەزن و ئالۆز پێدڤی ب دەمی و پشتەڤانیا هەموو هێز و ئالیێن سیاسی یە، نها یا پێدڤی دهێتە کرن.
ئەو یەک د دەمەکێ دایە کو بەری دو رۆژان سەزگین تاریکولو ئەندامێ پەرلەمانێ تورکیا کو د هەمان دەمی دا ئەندامێ کۆمسیۆنا ئاشتیێ یە، رەخنەیێن دژوار ل دەستهەلاتا نها یا تورکیا گرتن و دیار کر، د ناڤ دەستهەلاتێ دا گەلەک کەس ل دژی قووناغا ئاشتیێ نە، ئاکپارتیێ دڤێت قووناغا ئاشتیێ ژ بۆ بەرژەوەندیێن خوە بکار بینیت و د بەرنامەیێ ئاکپارتیێ دا نینە کو پرسا کوردی چارەسەر بکەت و هەکە رەوش وەسا بەردەوام بیت دێ جارەکا دی ئالۆزیێن مەزن ل تورکیا روو دەن، چونکی هێشتا ژی ئاکپارتیێ بریارا ئاشتیێ و چارەسەرکرنا پرسا کوردی نەدایە و هەموو تشتێن نها ئاکپارتی دکەت تنێ بۆ پاراستنا دەستهەلاتا خوە یە.
