یا ژ خشیمان ڤه هه‌می دخشیمن!!
به‌ری چه‌ند رۆژه‌كا به‌رپرسێ پارتیا كاركه‌رێن كوردستانێ، یێ ژ نفشێ تركی، ده‌ستهاڤێنه گێڕانا رۆلێ خوه ل ڤی هه‌یامێ، تێدا سوحبه‌تا ئاڤاكرنا ده‌وله‌ته‌كا كوردستانێ مشه و گه‌رم دهێنه‌كرن و فه‌لسه‌فا خوه‌یا بنیات ترك هێڤه ئینا و وێڤه بر و گۆت حوكمه‌تا هه‌رێما كوردستانێ كوته‌كیێ ل ئێزدیان دكه‌ت و حه‌قێ وان دخۆت. حه‌قێ وان ب ئاڤاكرنا كانتۆنێ دا نیاسین، كانتۆنا سێویا شنگارێ د ناڤ ده‌وله‌ته‌كا دستوورێ وێ فیدرالی و ئێزیدی و كوردێن ده‌ڤه‌رێن سه‌ر ب مووسلێ ڤه بووینه ئه‌گه‌رێ داناندنا سیسته‌مێ فیدرالی، چونكو 42% ێیا مووسلێ ئه‌ڤ سیسته‌مه سه‌رئێخست. هه‌كه دیتنا كالكانی ئانكویه‌ك هه‌بیت ژ ئه‌ڤا خارێ ناده‌ركه‌ڤیت.
ئه‌و حوكمه‌تا هه‌رێمێ یا ده‌وله‌تا تركیا، یا پارتیا ناڤبری نوكه بۆ سالیسكیا سیاسی دكه‌ت و خوه دبه‌ر ده‌ست و پێن وان ڤه‌دده‌ت، ده‌ڤگۆتكری و تێكهه‌لیێن بازرگانی و دیپلۆماسیێن ب هێز ل گه‌ل هه‌ین و ئه‌و سه‌ركۆمارێ، نوكه پارتیا كاركه‌ر ل ژێر ئالا و ده‌ستهه‌لاتا وی ناڤێ كورد و كوردستانێ ژ ناڤ نڤیسین و داخوازیێن خوه هه‌لاندین، یێ دبن وێ ئالایێڤه ده‌ربازی ناڤ فڕینگه‌ها هه‌ڤلێرێ بووی و ب ڕه‌خ سه‌رۆكێ وێ هه‌رێمێڤه یێ ب كوردی په‌یڤی، نوكه پارتیا ناڤهاتی دبێژیت ئه‌م ده‌ستهه‌لاتا حوكمه‌تا كوردستانێ ل سه‌ر ژێریا كوردستانێ ده‌ڤگۆتنا كه‌ین (ئیعتیرافێ پێناكه‌ین).
نوكه، د ڤی هه‌یامێ هنده نازكدا، ئه‌ڤ پارتیا هه‌نێ دبێژیت ئه‌م هه‌بوونا ده‌وله‌ته‌كا كورد سه‌رڤه‌گێڕیا وێ بكه‌ن قه‌بوول ناكه‌ین، مه‌هانه ئه‌وه دێ بیته ده‌وله‌ته‌كا نفشێ كوردان د به‌رژه‌وه‌ندیا ملله‌تێن ده‌ڤه‌رێدا نینه، هه‌روه‌كی ئه‌ڤه ژ سه‌رێ چه‌رخێ بیستێ وه‌ره مه عه‌ره‌ب و ترك و فارس دبه‌ر پێ خوه ڤه‌داین و كوته‌كی لێكری و حه‌قێن وان خارین و وان ژ باشیێ پێڤه دگه‌ل مه نه‌كری!
یا مای پارتیا ناڤهاتی ژڤانه‌كی دیاركه‌ت كادێ كه‌نگی ده‌ستكه‌كێ گولێن ره‌ش دانیته سه‌ر قه‌برێ شێخ عوبه‌یدولاهێ نه‌هری و شێخ سه‌عیدێ پیران و سه‌ید رزایێ دێرسمی و ئیحسان نوری پاشای و جزیرا پایته‌ختا به‌درخانیان ئێخیته بن رێڤه‌به‌ریا تركه‌كێ تركه‌شی.
ئه‌رێ ئه‌ڤه‌یه ڤه‌ڕێژا هه‌می پڕۆپاگه‌نده‌یا چێكرنا ده‌وله‌ته‌كا كوردی ل ژێریا رۆژهه‌لاتێ تركیێ (ژووریێ كوردستانێ). ما مرۆڤی حه‌ق نینه ڤێ پسیارێ بكه‌ت: ئه‌رێ پا ئه‌و تشتێ حه‌تا به‌ری عه‌بدولا ئۆجه‌لان بهێنه‌گرتن چ بوو هه‌كو گێنگه‌شێن خوه یێن دژوار دكرن و دگۆت ئه‌مێ ده‌وله‌ته‌كا كوردستانێ ئاڤاكه‌ین؟ ئه‌رێ مانه ب ڤی درووشمی كورد هاتنه خاپاندن و ب هزاران مرۆڤێن كورد د وێ گه‌ره‌وێدا چوون و نوكه د گونه‌هبارن ب نفشپه‌رێسیێ چونكو یا خوه بۆ دۆزا ملله‌ته‌كێ ته‌په‌سه‌ركری ب ناڤێ (كورد) دایه‌كوشتن و دڤیا كورد ژ بن نیرێ كوته‌كیا تركا ده‌ركه‌ڤن و حه‌قێ خوه یێ ده‌وله‌تبوونێ وه‌رگرن؟ ئه‌رێ مانه دڤیا نوكه پسیار ژ شه‌هید عه‌گیدی بهێنه‌كرن ته بۆچی خوه بۆ درووشمێ ده‌وله‌ته‌كا كوردستانێ داكوشتن. مانه نوكه وه‌رگرتنا وان داخوازیان بۆ گونه‌هه‌ك مه‌زن و توكه‌كا رتلێكرنێ ب ناڤ چاڤێن مالێن شه‌هیداڤه؟ مانه دایكێن شه‌هیدا هاتنه گونه‌هباركرن كو زاڕۆكێن خوه ل سه‌ر نفشپه‌رێسیێ خودانكرینه. ئه‌رێ ژ كالكانی پێڤه تركه‌ك هه‌یه ل گه‌ل پارتیا كاركه‌رێن كوردستانێ و ئه‌و ژی به‌رده‌وام پێكۆلێ دكه‌ت ناڤبه‌را كوردان خراب بكه‌ت.
ئه‌رێ ما دێ پارتیێن نفشێ كالكانی هێلن پارتیه‌كا ب ناڤ یا كوردان رێڤه‌به‌ریا تركێن ئه‌ڤه نێزیكا هه‌شت سه‌د سالایه حوكمداریا ئاسیا بچووك دكه‌ن، هه‌ما ب شه‌ڤه‌ك و رۆژه‌كان بهێن حوكمی ل وان بكه‌ت و كالكانێ ب كوردان بوویه مرۆڤ د دلیڕا ناچیت كوردان ده‌وله‌تا خوه هه‌بیت و حوكمی ل ده‌ڤه‌ره‌كێ بكه‌ن و بهێنه رێز و بازا تركا!!
كالكانی نه‌ڤێن كوردان ده‌وله‌ت هه‌بیت، پا چاوا دێ تركێن خوه ژ كوردان بلندتر دبینن قه‌بوولكه‌ن كورده‌ك ب ناڤێ دیمۆكراتیا گه‌لا حوكمی لێ بكه‌ت و كۆمۆنیستیا نه‌شیای نانی بده‌ته خه‌لكێ رۆسیا بێخیته ئاقلێ وان!!
هه‌میێ بلا ببێژن، به‌س ئه‌ڤێ نهﺀ، چونكو ئه‌قل و مه‌نتق قه‌بوولناكه‌ن و ترك ژی هند ژ خوه بێهیڤیبوونه، سه‌رهه‌فسارێ خوه بێخنه ده‌ستێ كوردان.
د دیرۆكێدا ئه‌م كورد دخشیم بووین و مه یا خوه ددا ب یا خه‌لكێ، به‌لێ ئه‌م نه‌شێین نوكه ملله‌تێن رۆژهه‌لاتی خشیم كه‌ین دا حوكمی لێ بكه‌ین.
